Bandièra01 capçalera  1180x150: Botiga

Actualitats

Un an de detencion de l’activista cashmiri pròdreches umans Khurram Parvez

D’organizacions internacionalas e d’expèrts de l’ÒNU ne demandan la liberacion immediata

Tèxte legit

Fa un an que l’activista cashmiri pròdreches umans Khurram Parvez foguèt arrestat per l’agéncia antiterrorista d’Índia (NIA) jos l’acusacion d’èsser implicat dins d’activitats terroristas en Cashmir e de conspirar per far la guèrra a Índia. Un an apuèi, la detencion es totjorn preventiva e non s’es debanat pas cap de jutjament.
 
Parvez es lo coordinator de la Coalicion de la Societat Civila de Jammu e Cashmir (JKCCS) e de l’Associacion dels Parents de Personas Desaparegudas (APDP), dos dels collectius mai actius en la denóncia de las violacions dels dreches umans de part de las autoritats indianas en Cashmir.
 
Una desena d’organizacions pròdreches umans, dont Amnestia, Human Rights Watch, Minority Rights Group e Front Line Defender, n’an demandat la liberacion immediata per mejan d’un comunicat. “Sa detencion arbitrària”, çò ditz lo tèxt, “fa partida d’una lista duradissa de violacions dels dreches umans comesas per las autoritats indianas contra de defensors dels dreches umans, d'organizacions de la societat civila, de jornalistas e activistas en Jammu e Cashmir”.
 
“Las autoritats indianas”, çò contunha lo comunicat, “an de liberar Parvez immediatament e sens condicions, e devon retirar totas las cargas contra el, compte tengut que son de represalhas per son trabalh pacific en favor dels dreches umans”. Aquela crida l’an tanben joncha divèrses expèrts del Naut Comissariat de las Nacions Unidas pels Dreches Umans.
 
Cashmir es un territòri disputat entre Índia e Paquistan dempuèi l’epòca de la Particion. La Val de Cashmir, ont residís la majoritat del pòble cashmiri, se tròba somesa a un regim policièr e militar. En 2019, lo govèrn indian suprimiguèt l’autonomia de l’estat de Jammu e Cashmir.

 
 
Aquesta nòva es adaptada de Nationalia, amb qui Jornalet ten un acòrdi de cooperacion.



abonar los amics de Jornalet

 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article