Bandièra01 1180x150: Comuna de Tolosa

Actualitats

Rugbi de XIII: Lòrd Derby se congosta al pè de Ciutat

Carcassona empòrta la copa Lòrd Derby
Carcassona empòrta la copa Lòrd Derby | Alain François – Carcassonne XIII

Tèxte legit

Aqueste dissabte 22 de vèspre, la tramontana de l’estadi Brutus s’interessèt al debanament de la finala de la Copa Lòrd Derby entre Carcassona e Albi. Los audencs dominèron las primièras minutas, mas son los albigeses que marquèron lo primièr ensag. A la 24a minuta, Alèxis Alberola marca entre los pals un ensag de talonaire. Sus la remesa en jòc, Albi preniá l’avantatge 8-6 mercé a una penalitat. A la 31a minuta, candela carcassonesa: l’arrièr e l’alièr dels Tigres se gaitan e Vincenç Albèrt agafa la palma per l’anar pausar darrièr la linha. A la pausa, Carcassona mena 10-8.

Dins lo segond temps, los Canaris jògan contra lo vent e van mestrejar la partida.Tre la represa, candela: l’arrièr albigés manca la palma, placa un jogaire sens balon, Boregba marca e Miloudi pren un jaune. 51a: còp de pè a seguir d’Herrero, Gigòt gaita la pauma sortir e Escarré li punta l’ensag jol nas !

Dauliac pausa la pauma just sus la rega (56a). Amb la transformacion, Carcassona mena 26-8. 62a: amb un saut del genre NRL, Cance redusís la marca per Albi. 70A: lo capitani Alexís Escamillà marca en cap de linha. A cinc minutas del tèrme, amb una chistera, Vincenç Albèrt lançava son alièr Gambarro marcar lo darrièr ensag: victòria de Carcassona 36-12. Carcassona empòrta sa setzena Copa Lòrd Derby que torna menar al pè de Ciutat.

Las doas formacions se poirián tornar trapar a Domèc en mièja finala del campionat, mas demòra als tarneses d’eliminar los pianencs.

Selon de Provença ganhèt la Copa dels U15 e Baó la dels U17.

En Nacionala, Ferrals bat Pomàs en quart de finala 38-20. Las mièjas finalas opausaràn Pàmias e Ferrals d’un caire; Palau e Realmont d’autre caire. Aquesta dimenjada, se jogaràn los barratges d’Elèit 2: Vilagalhenc-Argon tornarà trapar Baó e l’Escura reçauprà Entraigas.

 

Rescontres internacionals a Warrington

 

Las esquipas de França de las femnas e dels òmes rescontraràn las formacions anglesas aqueste dissabte 29 d’abril de vèspre a Warrington.

Laurenç Fraissinós a seleccionat de jogaires dels Dragons e de Tolosa e tanben d’autres qu’an ja portat lo malhòt catalan.

 

Superliga: Los Dragons patisson

 

Es un pauc complicat pels Dragons d’aquesta passa. Jogavan aqueste dimenge cò dels Diables Roges de Salford. Prenon un ensag just abans la pausa ont seràn menats 14-4. Dominan d’un biais estèrle lo segond temps. Dins la darrièra minuta, Keighran marca l’ensag mas manca la trasformacion qu’auriá menat al punt en aur. Desfaita 16-14, la tresena en seguida. Aprèp la pausa internacionala, serà lo campion Saint Helens que vendrà a Brutus lo divendres 5 de mai.

Saint Helens torna partir de l’abans e domina Warrington: 28-6. Hull KR s’impausa a Castleford: 12-7. Leigh bat Leeds: 23-6.

 

NRL: los Cavals Fòls confirman

 

Los Lapinons an batut Penrith: 20-18. Los Bròncos son anats ganhar a Parramatta: 26-16. Corta victòria dels Vaquièrs fàcia a Newcastle 18-16 e dels Dalfins fàcia als Titans: 28-26. Novèlas desfaitas dels Dògols contra las Làmias 20-33 e dels Tigres fàcia a Manly: 16-22. Los darrièrs dos rescontres d’aquesta ueitena jornada Polets-Dragons e Melbourne-Neozelandeses se tendràn aqueste dimars.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

L'Alan Carcassona
2.

Fin finala, Taukehiao es pas suspendut, mas a una esmenda de pagar.

  • 0
  • 0

Escriu un comentari sus aqueste article