Bandièra01 1180x150: País Invisible

Actualitats

Borriana: acamp nombrós per la lenga après l’enebicion de las revistas en catalan

Mai d’un milièr de personas se recampèron diluns davant la bibliotèca de la vila per exprimir lor indignacion

Borriana: acamp nombrós per la lenga après l’enebicion de las revistas en catalan
Borriana: acamp nombrós per la lenga après l’enebicion de las revistas en catalan

Tèxte legit

Un acamp nombrós se tenguèt diluns passat a Borriana, una vila valenciana d’environ 35 000 abitants, en protèsta contra la censura de las publicacions en catalan. Mai d’un milièr de personas se recampèron davant la bibliotèca de la vila per exprimir lor refús al conselh municipal qu’a interdichas las revistas escrichas en la lenga del país. Tant las associacions que defendon la lenga e la cultura coma d’estatjants de la vila manifestèron lor determinacion per respondre a las agressions de l’extrèma drecha contra lo catalan.

Es pas lo primièr còp que l’extrèma drecha avia de campanhas agressivas contra lo catalan al País Valencian e dins las illas Balearas. Aqueles grops defendon de posturas contràrias  a la normalizacion de la lenga e an ensajat de generar de polemicas e de confrontacions sus aquela question.

Al País Valencian, l'extrèma drecha e tanben la drecha dicha non extrèma an utilizat e encara utilizan la censura coma estrategia per restrénher l'usatge del catalan dins las institucions publicas, coma es lo cas de la bibliotèca municipala de Borriana, ont lo cònsol encargat de la cultura, membre de Vox, a enebit l'accès a las revistas en catalan.

Dins las Illas Balearas, es parièr: l'extrèma drecha e tanben la drecha dicha non extrèma mòstran lor oposicion a la normalizacion del catalan.

Dins los dos cases, lo partit d’extrèma drecha espanholista Vox sosten los executius regionals elegits en mai passat amb de condicions qu’exigisson de metre lo ponch final a las politicas feministas e en favor dels dreches LGBT, e de combatre la lenga catalana, ça que la ja fòrça fragilizada davant lo castelhan ajudat per l’estat espanhòl.

 

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Jòrdi Caldentey Manacor (Malhòrca)
1.

Al començament del sègle XX lo catalanisme separèt lo catalan de la rèsta de la lenga d'òc perque l'occitan s'usava pas gaire e èra fòrça francificat.

Ara lo catalan dintra dins lo meteis pauc usatge e dins l'espanholisacion linguistica.

Pr'amor d'aquò, lo catalanisme pòt pas mai gardar amb aires de superioritat l'occitan: es arribada l'ora de la nòstra reunificacion, de la reintegracion catalanoccitana.

  • 1
  • 0

Escriu un comentari sus aqueste article