A Bordèu, los cavaments arqueologics preventius menats dempuèi genièr d’ongan sus la Plaça Renaudel, en amont d’un projècte de vegetalizacion, liuran de descobèrtas màgers, çò rapòrtaSud-Ouest. Jos la direccion del Servici Arqueologic de Bordèu Metropòli e en collaboracion amb la Direccion Regionala dels Afars Culturals (DRAC), los arqueològs an exumat un centenat de sepulturas, confirmant l’existéncia d’una vasta necropòli merovingiana datant dels sègles VI a VIII.

Aquela necropòli, situada devèrs la glèisa Santa Crotz, foguèt localizada en 2016 pendent d’òbras precedentas. Dempuèi alara, mantuna descobèrta enriquiguèron la coneissença del sit amb tres sepulturas davant lo Teatre Nacional de Bordèu a l’auton de 2024, puèi quatre sarcofags a la debuta de 2025 a l’angle de la Carrièra del Portal. Los sarcofags recentament meses al jorn, an solament 1,10 mètre de prigondor, son caracteristics del periòde merovingian: forma trapezoïdala e cabucèlas de dos pendents.

Mas las suspresas s’arrèstan pas aquí. Los arqueològs an tanben retrobat los vestigis d’una clastra benedictina, provant l’ocupacion religiosa continua de sit, dempuèi l’Antiquitat fins a l’Edat Mejana. Lo talhièr, qualificat «d’excepcional» per Laurent Guyard, responsable del servici arqueologic, s’espandís sus près de 2700 m² e se deuriá perseguir fins a l’acabada de 2026.