Fins ara, se considerava qu’una temperatura superiora als 35 grases podiá provocar de grèus problèmas de santat en l’èsser uman pr’amor qu’avèm una capacitat limitada a l’ora de luchar contra la calor, coma totes los animals. Ongan, una còla de cercaires an establit qu’aquela temperatura environamentala es sonque de 31 ^oC e amb mens d’un 50% d’umiditat. Pr’amor que, se la temperatura es màger o se i a mai d’umiditat, i a un risc de dangièr plan real per la nòstra santat.

Car lo nòstre còrs sonque pòt luchar un pauc contra la temperatura nauta se l’umiditat es mendre que lo 50%. Mai enlà, lo còrs comença de se poder pas refrigerar e tanben comença de montar la temperatura corporala fins a d’extrèms pas brica sans. Se la temperatura es màger que 31^oC, lo còrs pòt pas pus termoregular la nòstra temperatura corporala e doncas aquesta comença de créisser.

La temperatura ideala

D’efièch, segon los cercaires qu’an fach aquel estudi, la temperatura optimala del nòstre còrs seriá de 37^oC amb mens del 50% d’umiditat. Delà aquesta temperatura, lo còrs uman comença de patir una ipertermia que, se dura plan, pòt menar al mal de cap e puèi a la pèrda de consciéncia. Se la temperatura corporala arriba a 41^oC, se produtz la mòrt. Perque lo nòstre sistèma corporal per termoregular la temperatura, la transpiracion, pòt pas pus plan luchar contra la temperatura environamentala nauta a mai de la nauta umiditat. Mas aquò serà çò que passarà pus sovent desenant, çò dison los cercaires de l’estudi, pr’amor del cambiament climatic.

Un futur inquietant

Los cercaires realizèron divèrsas simulacions per veire quinas serián las temperaturas mejanas en estiu qu’afectarián dins lo futur mai pròche. La resulta foguèron de temperaturas de 42^oC amb un 51% d’umiditat o encara de temperaturas mendres (de 26^oC a 31^oC) mas amb una umiditat pus nauta (70-80%). L’estudi foguèt publicat dins lo numeric PNAS.

Per far l’estudi, una còla de cercaires de l’Universitat d’Ottawa, en Canadà, sollicitèt 12 volontaris joves. Qu’intrèron dins una cambra. Aquesta aviá 42^oC de temperatura e un 28% d’umiditat. Puèi la temperatura cresquèt fins a arribar al 51% d’umiditat. De 42º C e 51% d’umiditat environamentala enlà, la temperatura dels volontaris comencèt de créisser.

“Fins ara, se considerava que delà aquela temperatura lo còrs uman se pòt pas pus autoregular, çò diguèt Robert Meade, lo cercaire que dirigiguèt l’estudi. E aquò provòca una creissença rapida de la temperatura corporala fins que la santat comence d’èsser en dangièr”.

Aital, après 9 oras dins un cambra amb una temperatura de 42^oC e un 45% d’umiditat, la temperatura corporala dels volontaris èra màger: “Es un dels registres mai longs jamai estudiats sus la reaccion fisiologica umana en de condicions fòrça caudas, çò confirmèron los cercaires”.

L’estudi doncas confirma las resultas d’autres estudis anteriors. En 2023, foguèt considerat qu’entre 26 e 31^oC èra la temperatura maximala que se pòt suportar se i a pas tròp d’umiditat (entre un 28% e un 51%). Fins a 2010, s’estimava qu’aquela temperatura maximala èra de 35^oC amb una umiditat mai fòrta.

Pasmens, los cercaires an volgut soslinhar que l’umiditat environamentala podiá encara èsser plan mai importanta per la nòstra santat, mai encara que la quita temperatura. Se l’umiditat es superiora al 51%, lo còrs uman pòt pas pus transpirar. O, dich d’una autra manièra, transpirar servís pas pus per res pr’amor que lo còrs uman se pòt pas pus refrigerar (la tòca finala de la transpiracion).

“Lo còrs uman, en aquelas condicions, pòt pas pus arrestar la calor o regular la temperatura corporala”, çò apondèt Robert Meade. Lo cambiament climatic comença de provocar de grèus problèmas de calor pertot. E los cercaires vòlon avisar: “Ara pas gaire de regions de la planeta an de temperaturas mendres. La majoritat an de temperaturas superioras e pendent longtemps, çò afirman. E la situacion en Asia meridionala, Africa del Nòrd e Orient Pròche lèu serà critica”.

Car la majoritat d’estudis sus la temperatura corporala foguèron realizats dins de païses septentrionals. Mas es pas ailà ont i una màger temperatura o una umiditat totala (mai del 90%). E doncas cal far de nòus estudis dins los païses pus meridionals, ont las èrsas de calor son pus grèvas, çò demandèt Robert Meade. Car, se la populacion demòra almens 20 jorns amb una umiditat excessiva, lo dangièr per la nòstra santat pòt èsser grèu. E en 2100 gaireben tota la populacion de la Tèrra patirà aquelas òrras temperaturas segon plusors d’estudis sus lo cambiament climatic. (Legissètz la seguida).

Aqueste article es publicat dins Sapiéncia, la revista occitana de divulgacion scientifica, amb la quala Jornalet a un acòrdi de cooperacion. Podètz legir l'article entièr aicí.