Lo 6 de mai de 2025, lo tribunal correccional de Fois reconeguèt la responsabilitat del caçaire que tuèt l’orsa Caramelles, pendent una batuda illegala en 2021 dins los Pirenèus de Comenge. Segon Vert, l’òme, annadit de mai de 80 ans, es condemnat a quatre meses de preson amb ajornament, a 750 èuros d’emenda e a la confiscacion de son permés aital coma de son arma. Los autres quinze caçaires implicats an recebudas de penas d’emenda e, per dos d’entre eles, d’una suspension de permés.

L’afar a suscitada una fòrta mobilizacion de las associacions de defensa de la fauna, sustot de País de l’Ors, qu’a saludada una decision «justificada». Lo tribunal a tanben reconegut un prejudici moral e ecologic, en condemnant collectivament los caçaires a pagar mai de 60 000 èuros a dètz e sèt associacions.

Malgrat las justificacions avançadas (l’estat de legitima defensa evocat pel tiraire e l’abséncia de senhalizacion de defensa), lo procuraire insistiguèt sus la presa de risc deliberada dels caçaires en intrant dins una zòna protegida. L’avocata de catòrze dels caçaires, Fanny Campagne, aviá mesa en dobte «la legalitat de la constitucion de la resèrva» ont subrevenguèt l’accident. Aviá tanben denonciada «l’abséncia de senhalizacion de defensa de caça» dins aquela zòna.

Aquel afar relança lo debat sus la coabitacion entre umans e orses dins los Pirenèus, ont mai o mens son recensats 100 individús. Segon Alain Reynes, director de País de l’Ors, sa populacion demòra fragila e encara a besonh de mesuras concretas que garentiscan sa viabilitat. Lo verdicte representa un senhal fòrt: la lei protegís la fauna salvatja e vòl far respectar aquelas règlas.