L’occitanisme sap plan que totas las accions comptan, e que cap d’esfòrç es tròp petit. Cada iniciativa, cada gèst, cada moment ont l’occitan se farga una plaça dins l’espaci public es un pas de mai cap a sa dignitat, la conquista del còr de nòstras conciutadanas e nòstres conciutadans, dins aquel camin long de reconquista de son espaci social. Aquesta setmana, anonciàvem una d’aquestas accions poderosas, gràcias a la còla de l’associacion Ligams Tarn, que pòrta La Passem en Albigés, après lo succès ja enregistrat en Gasconha.

De 400 quilomètres en 2018 a 1100 en 2024, La Passem es venguda una aventura collectiva qu’a traversat vilas, vilatges e còr dels occitans, tot en recoltant mai de 200 000 èuros per finançar de projèctes per la lenga. Ara, Albigés se met a la corsa. De Sant Somplesi a Albi, en tot passar per Castras, Galhac o Còrdas, la lenga va viure al ritme dels passes, dels cantaires, dels dançaires, dels calandrons, dels militants...

Aquel simbòl d’un testimòni que se transmet de man en man nos remembra çò mai essencial: la lenga la cal transmetre, e o mòstra clarament la man que dona e la man que pren. Pr’amor d’aquò, La Passem es mai qu’una corsa e mai qu’una fèsta. Es una crida a l’accion. Es una pròva que l’occitan pòt tornar prene sa plaça dins la societat, qu’es pas condemnat al silenci de las bibliotècas o de las salas d’estudi, mas qu’a tostemps vocacion a ressonar per carrièras, pels camins, per las estradas, dins los mases, los vilatges, las vilas, los cafès, los bars, las botigas…

Esperam que lo coratge de Ligams Tarn portarà la flama de la lenga a fòrça mond e que son prètfach venga un exemple per d’autras còlas occitanistas, dins totes los parçans d’Occitània. Es la soma de totas nòstras accions que bastirà lo camin per viure al país, per i viure en occitan e a la faiçon occitana.

Cadun pòt far quicòm. Cadun pòt sosténer, participar, crear, animar, portar. Que la corsa d’Albigés siá una crida a portar La Passem endacòm mai per que la lenga siá vista, ausida, partejada, viva... e sustot aimada.

Per sosténer l’edicion albigesa de La Passem podètz aderir a l’associacion Ligams Tarn o ben far un don per mejan d’aqueste ligam.