Bandièra01 1180x150: Comuna de Tolosa

Actualitats

crotz-tolosaCreated with Sketch.LengadòcLengadòc NautTolosan

Tolosa: l’enfant borrèl de Daish reconegut per sos ancians camaradas

L’Estat Islamic (Daish) aviá difusat un vidèo que mostrava un enfant d’un desenat d’ans executant un presonièr

Al collègi Vauquelin de Tolosa, granda es l’emocion demest los escolans de seisena. D’efièch, d’unes d’eles venon de reconéisser Ryan, qu’èra lor camarada en CM2 a l’escòla elementària Los Vergièrs (Les Vergers).
 
La setmana passada, Daish publiquèt en linha un vidèo que mostrava un dròlle d’un desenat d’ans executant amb un pistolet un òme acusat d’èsser un espion israelian. Per respècte de la vida umana, Jornalet difusarà pas lo vidèo. Al costat de l’enfant vengut borrèl, parlava un autre òme, en francés amb l’accent occitan de Tolosa. Sembla que siá Sabri Essid, partit per Siria fa un an, a la prima de 2014. Sabri Essid ten de ligams familials amb Mohamed Merah, que matèt fa tres ans tres militars e quatre personas d’una escòla josieva de la Ciutat Mondina abans de se far tuar per la polícia après un acarament armat. D’efièch, lo paire d’Essid es ara l’espós de la maire de Merah.
 
Ryan, qu’aviá onze ans l’an passat, aviá pas acabada son annada a l’escòla elementària, e tre l’11 de març de 2014, l’avián senhalat coma absentista. Ara sos ancians camaradas recebrián un acompanhament psicologic.
 
Es pas lo primièr còp qu’una organizacion jihadista fa servir d’enfants per sos interèsses criminals. Per exemple, la sècta islamista nigeriana Boko Haram, fa dos meses, estaquèt de bombas a de drolletas per cometre d’atemptats sagnoses. Boko Haram ven de jurar fidelitat a l’Estat Islamic.
 
En Occitània, lo cas crusèl de Ryan recòrda l’atraccion del jihadisme sus una part de nòstra societat.


Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article