Bandièra01 1180x150: Comuna de Tolosa

Actualitats

Rugbi XIII: la formacion de Queensland, mèstra d’Austràlia

Rendètz-vos decisiu pels Dracs aqueste dissabte 18 de julh a Perpinhan, fàcia als Gigants d’Huddersfield
Rendètz-vos decisiu pels Dracs aqueste dissabte 18 de julh a Perpinhan, fàcia als Gigants d’Huddersfield
Los afogats del XIII an recebut aqueste dimècres un present de primièra: lo debanar de la tresena partida dels Estats d’Origina. Queensland aviá ganhat primièr, 11-10; La Nòva Galas del Sud s’èra ganhat lo segond acte, 26-18. La bèla se joguèt al Suncorp de Brisbane, plen coma un uòu: 52 500 espectators, la contenença maximala de l’estadi e 117 païses retransmetián la partida!
 
Aprèp un temps d’observacion, concretizat per una penalitat de part e d’autra, los Violets de Queensland prenguèron la volada a l’entorn d’un ais magic: lo talonaire Cameron Smith, lo mesclanha Cooper Cronk e lo dobertura Jonatan Thurston en ajustant Greg Inglis , aqueste còp arrièr, coma quatren mosquetari. S’ocupèron a accelerar lo jòc, a diversificar los còps de pè, a escartar las palmas sens relambi. Atal, tres ensages transformats e una penalitat portèron l’avantatge dels locals a 22-2 a la pausa.
 
Tre la represa, los Blaus pachaquèron una palma que se transformèt sul pic en un novèl ensag de Queensland: 28-2. La messa èra dita. A 40-2, Jennings interceptèt una passa per marcar la sola realizacion de son grop de la serada. Dos ensages de mai completèron la victòria de Queensland. Thurston qu’aviá tot encapat —sèt transformacions e doas penalitats— daissèt lo centre Hodges ensacar la darrièra transformacion per sa 23a e ultima participacion a l’afrontament: 52-6 a la fin. E de trabalh per la Nòva Galas del Sud per contrastar tre l’an que ven l’empresa de Queensland (nòu sèrias ganhadas dempuèi 10 ans, levat la de 2014).
 
 
Los Dracs son al pus mal!
 
Los Dracs partiguèron a Widnes sens Carney encara nafrat e Zeb Taia, sason acabada per Yaha tocat a l’espatla... Laurenç Fraissinós faguèt rampèl als jogaires dels Dragonets Sigismeau e Margalet e tanben al dobertura dels U19, Lucàs Albèrt (lo calandron que n’avèm ja parlat).
 
Los Dracs ataquèron coma cal la partida e marquèron dos ensages per Anderson e Whitehead que Scott Dureau transformèt: 12-0. E aquí coneissètz ja e tròp plan la seguida: los Dracs se faguèron ragantar puèi despassar abans la pausa 18-12. Dins lo segond temps, i aguèt encara quicòm per empachar lo contraròtle del jòc pels catalans. Quand se trapèron menats 29-12, los Dracs plantèron dos ensages per Whitehead e Escarré dins las cinc darrièras minutas per tornar a 29-22 http://www.catalansdragons.com/articles-9/109-3393-les-dragons-sinclinent-a-widnes/ , de punts que serviràn se la qualificacion se jòga a la diferéncia de punts http://www.superleague.co.uk/matchday/league_table .
 
E dissabte, contra Huddersfield, a Brutus (6 oras del vèspre), la qualificacion passarà necessàriament per la victòria. Tota autre resultat poiriá remandar los Dracs, jos la pression de las doas formacions d’Hull, dins la pola espaventabla que decidirà qual jogarà en Superliga l’an que ven. Ven al public catalan e occitan de jogar lo catorzen òme: totes a Brutus dissabte!
 
Son de notar las victòrias dins las darrièras segondas amb una penalitat de Wigan sus Leeds 26-24 e amb un tombat de St. Helens sus Huddersfield: 35-34!
 
 
Pensar ja a la sason venenta
 
Los Dracs an tornat faire signar Julian Bosquet, Jason Baitieri e Loís Anderson. An engatjat ferme Tòni Gigòt e faràn venir d’Austràlia l’alièr irlandés experimentat Pat Richards que faguèt lo bonaür de Wigan d’ans e d’ans e lo mesclanha de Warrington Richie Myler, per remplaçar lo menaire de jòc Scott Dureau que tornarà en Austràlia coma Zeb Taia.
 
 
Intersason plan complicada al pè de Ciutat
 
Lo temps de la represa d’entraïnaments collectius es vengut per las formacions d’Elèit. Los Dragonets se son ja recampats.
 
A Albi, la represa es per aqueste diluns 13. L’esquipa que torna trapar l’Elèit 1 se contentarà pas de faire de figuracion: a fait signar l’avinhonenc Djamel Remok, l’escurian Benaset Rigal, los tolzans Emine Bouzada, Quentin Henrion e Carles Niez e  se fa venir de l’emisfèri sud lo pilar Brendab Horwood, Zach Friend, lo mièg neozelandés Freddie Robinson e lo tres quarts o arrièr fijian Sakeo Debeci. Demorarà a l’entraïnaire de faire la mescla amb 14 jogaires qu’an permés a Albi d’èsser campion d’Elèit 2.
 
A Carcassona, lo primièr rendètz-vos es fixat al diluns 20 de julh, mas quins jogaires seràn presents? L’abans Bastian Canet es partit per Austràlia prene part a la fin de sason aval cò dels Blayne Bears RLFC , una esquipa del campionat regional de la Nòva Galas del Sud, puèi anarà probable a Tolosa. Amar Sabri parla de rejónher Saddaoui e Guiraud a Limós. Anderson, Barrau e Roanet prenon la direccion de Lesinhan. L’intersason es plan complicada al pè de Ciutat.
 
La Federacion ven de rendre public lo calendièr de las primièras fasas dels campionats d’Elèit que reprendràn la dimenjada dels 12 e 13 de setembre.
 
 
 
 
Alan Roch
 
 
 

Un ensag de tria: L'ensag del sègle segon la television neozelandesa!!!

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article