Bandièra01 1180x150: Comuna de Tolosa

Actualitats

Estat de catastròfa naturala en Vencenc e Costièra Niçarda

Son 21 los mòrts e los damatges son enòrmes. Las botigas del centre de Canas son en crisi

| Julie Trautmann‎Nice-Matin / Solidarité intempéries Alpes-Maritimes
Son ja 21 los mòrts pels aigats de la dimenjada passada en Vencenc e Costièra Niçarda, segon d’informacions de Nice Matin. Lo jornal niçard a creat un grop de Facebook per rassemblar las proposicions d’ajuda als sinistrats del temps qu’acampa de vestits qu’òm pòt liurar al numèro 2014 del Baloard de Mercantorn a Niça. La còla de Nice Matin s’ocuparàn de los transmetre a las associacions.
 
Mentretant contunhan las operacions de netejatge d’ostals e de carrièras negadas per la fanga e rèsta dobèrt lo debat se la tragèdia auriá pogut èsser evitada. Henri Leroy, primièr cònsol de Mandaluec la Napola (Vencenc), una de las vilas mai inondadas, assegura que foguèt imprevisibla.
 
Lo centre de Canas, mai que mai l’airal poblat per de gents umilas que son majoritàriament d’immigrants, es en risc de subir una fòrta revirada economica perque la majoritat dels establiments es estada destrucha.
 
Las societats d’asseguranças e las ajudas economicas publicas qu’a promés lo govèrn francés deuràn pagar de damatges pas encara quantificats. Lo responsable de la coordinacion de las asseguranças de l’estat francés a dich qu’es clar que l’efièch del cambiament climatic aumentarà las catastròfas coma aquesta dins los ans que venon.
 
Lo president francés, François Hollande, vesitèt la region dimenge passat e s’es engatjat a declarar l’estat de catastròfa naturala al Conselh dels Ministres de deman, e tanben a pagar las indemnizacions dins un relambi de tres meses.

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Reinat TOSCANO LO VAU
2.

Dissabta, èri à Moans-Sartòu, que laissèri vèrs 6 oras per m'en tornar dins Var, e pilhèri la chavana de Frejús fins au Luc. Ma ai evitat lo pèjor: l'endeman, en tornant à Moans, li èra d'aubres, de gravas, de beta sus l'autorota vèrs Mandeluèc (si passava sus una fila).
Pas de rota dirècta vèrs Moans. En passant vèrs Valbòna e Grassa, pas de problema: avia plougut, ma sensa degalh sus li rotas principali.
La geològa en question a ben rason! Basta regarja una carta per capir!

  • 3
  • 0
Pirolet
1.

Aquò de catastròfa naturala es per nos poder comprene, perdeque de naturala aquesta catastròfa a pas grand causa. Es de racar d'ausir lo conse de Mandeliu voler far passar la geològa de l'universitat de Niça per una piòta jornel del fenestron de ièr). Aquel tipe, se baileja la comuna dempuèi 95 coma diguèt, se pòt pas imaginar qu'aja pas daissat bastir sus las zònas dangierosas. E aquò l'empacha pas de dormir?

  • 10
  • 0

Escriu un comentari sus aqueste article