Bandièra01 1180x150: Comuna de Tolosa

Opinion

Minutinas III: Cap a l’infinit

Joan-Marc Leclercq

Joan-Marc Leclercq

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

Mai d’informacions
Desbrémbetz pas de’n parlar a l’entorn e de n’escríver vosautes medishes! De mandar a jomolo@orange.fr. Mercés!

 
 
 
Cap a l'infinit
 
Bugan es plan calat dins lo sièti de la cabina e contròla los paramètres de navigacion. La nau intergalactica es en bona via. Lo negre picotat de luzes pichonas qu’emplena lo fenetron o confirma. Tot vira dins l’òli dins lo negre de l’univèrs. La Tèrra deu pas mai èsser qu’un céser blau luènh darrièr eles.
 
Bòrn resquilha lentament dins l’estrech corredor-budèl que mena a la cabina. L’apesentor se l’es acostumada ara. Se ven pausar sul sièti a drecha de Bugan.
 
— Aquò put dins aquela bóstia! Çò comenta un còp installat.
 
Bugan remira totjorn lo vuège relatiu interstellar.
 
Bòrn agacha a son entorn, los ecrans, la cabina, son copilòt totjorn virat cap al bojal.
 
— Me demandi perqué an fach aqueste fenestron. I a pas res a veire.
 
— As tòrt Bòrn. I a tant de causas, es tant bèl, que cresi ben de poder meditar pels vints ans que venon.
 
— Dins aquesta carreta que put a plastic nòu, susor e escaufit, m’estonariá.
 
Lo silenci emplena lo vaissèl.
 
— Siás tu qu’a emplenat lo quasernet de viatge?
 
— Sèm pas que dos, Bòrn.
 
— Es claufit de fautas.
 
— L’ortografia èra pas dins los critèris que nos an seleccionats demest los 10 miliards d’umans que sèm.
 
— Ai pas enveja que l’òm pòsca imaginar que soi l’autor d’aquestas linhas.
 
Bugan s’esquicha dins son sièti, una calor li pren las aurelhas.
 
— As petat o aquò’s ton alen?
 
Flac! Los girofars liuçan, las serenas fiulan e bronzinan, d’aire jos pression s’engulha pertot. Pressurizacion d’urgéncia, los dos òmes sentisson subte un pes sus las espatlas que los cunhan dins los siètis. Las pòrtas s’alandan. Lo lum blanc e los tecnicians en blosa envasisson lo simulator sorne.
 
— De qué?
 
— Impossible! Çò crida Bugan. Lo suportarai pas per trenta ans de viatge espacial.
 
— Quaranta sèt minutas!
 
 
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article