Bandièra01 capçalera  1180x150: Novestivada

Opinion

L’abaia: dehéner la libertat dambe interdiccions?

L’abaia: dehéner la libertat dambe interdiccions?
L’abaia: dehéner la libertat dambe interdiccions?
Joan-Marc Leclercq

Joan-Marc Leclercq

Musician de profession, autor d’un líber de conversacion suu gascon, d'un roman istoric "Ucraïna", d'un diccionari de rimas e de duas pèças de teatre.

Mai d’informacions

L’auratz comprés au títou, me pausi questions sus l’interdiccion de l’abaia dens los establiments escolars decretada peu ministre de l’educacion.

E se pausar questions es pas possible dens l’esperit de daubuns que, segurs d’eths medishes, vos pòden cridar de totas s’exprimissètz un simple dobte. N’èi hèit dejà l’experiéncia.

Mes aquò rai. Vos expliqui mon dobte per tres punts sus aquesta decision deu ministre.

Purmèr un dobte legau. Una lei existís dejà sus la laïcitat, qu’interditz los vestits religioses a l’escòla. Mes segon lo Conselh Francés deu Culte Musulman, l’abaia n’es pas. Segon tanben Kahina Bahloul, una hemna imam (Qu’es a favor de l’interdiccion), es pas un vestit religiós, mes haut o baish politic.

Semblaré atau trencar lo peu en quate, mes s’apujar sus un tèxte qu’interditz A per interdíser B es pas brica rigorós. Caleré benlèu un aute tèxte abans que quauqu’un posca anullar l’interdiccion.

O se que non, vòu díser qu’Attal lo minstre coneish milhor la religion musulmana que sons representants oficiaus e una imama, o qu’aquestes darrèrs an pas lo dret de balhar lor punt de vista sus un subjècte de societat, un domau portat a la Convivéncia.

Mon dusau dobte es filosofic.

Filosofic, pr’amor que, com ac ditz lo títou, me sembla curiós de dehéner l’idèia de libertat de vestit per una interdiccion. Serí jo meslèu dens la dralha de “Nada obligacion, nada interdiccion.” Cau remercar qu’en Iran, lo monde manifèstan contra l’obligacion deu veu e non pas contra lo veu eth medish. Lo cantaire iranian Mehdi Yarrahi, que sostengui complètament, e perseguit per la justícia de son país, milita a favor deu “veu facultatiu” dens sa cançon Roosarito (“Ton veu” en persan).

Mon tresau dobte es estrategic. Se volèm lutar contra l’integrisme religiós (ací musulman), cau estar mès finòts que non pas eths.

Imagini que, dens los licèus, i a joens musulmans moderats e d’autes que son dejà engatjats dens un islam rigorós, e qu’ensajan de convéncer lors amics de la justessa de lor punt de vista. Sens de dobte, çò que pòt hèr esitar los moderats es justament lo costat excessiu e totalitari deu projècte islamista.

Coneishen la societat a l’entorn e son mès atirats per un sistèma de libertats que non pas per l’exemple autoritari deus autes.

Seré doncas pas una ajuda de las bonas aus integristas que de mostrar que la societat civila se pòt era medish tresmudar en sistèma autoritari que vòu regentar lo quite biaish dambe lo quau lo monde s’apelha?

Vesi dejà los fondamentalistas díser aus moderats que la laïcitat es pas qu’una seria d’interdiccions de mès, e serà mauaisit de trobar un argument contra aquò.

Sens de doblidar qu’a l’edat deu licèu (Me’n brembi plan), res de tau qu’una interdiccion per atirar los joens…

Vaquí doncas los tres punts que’m hèn dobtar de la pertinéncia de la decision d’Attal que, se que non, s’i es escadut de realizar un truc de comunicacion personau plan hèit a la dintrada.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Atal Atal Atawulf
1.

E parlas pas de la possibilitat d'una "tenue réglementaire" (nom amagat de l'unifòrm).
Qué ne pensas?
Ieu tròbi que se pòt enebir l'abaya sense discriminacion contra los musulmans, a condicion d'èsser clar sus aquò qu'es permés o non (coma dins l'ensenhament privat, se privan pas, per exemple sovent los dròlles an pas lo drech d'aver lo pèu long). Lo problèma es la manca de clartat e, coma per lo vèu, dissimulan a pro pena qu'es una lei contra l'islam politic.
Es enebit d'aver d'opinions politicas a l'escòla? Alara mon t shirt Che Guevara de quand aviá 17 ans seriá estat enebit uèi?.
Ieu soi a favor d'un uniform a l'anglo saxona, una mena de camisòt de fotbal, mas un de polit, amb l'ensenha de l'establiment (emai s'aquò es pas la solution a tot).

  • 2
  • 0

Escriu un comentari sus aqueste article