Es de cap a la fin de las annadas 70 qu’èi agut l’astre de véser se produsir dens l’ancian estadi deus Ponts-Bessons de Tolosa jogaires coma lo Jean-Pierre Rive, lo Jean-Claude Skrela, lo Jean-Louis Bérot e sustot lo Pierre Villepreux. Mes tanben un estremèr argent viu e insasible que s’aperava Roger Bourgarel, enchafrat “la Sageta Negra”. Nos regalava dambe sons fintabadauds e sas traucadas que hasèva pujar rugladas de plaser dens las rengadas d’Ernest Wallon. Mes mès qu’aquò, vasoc l’eròi d’una hèita internacionala hòranòrmas que marquèc lo monde deu rugbí e mès qu’aquò en 1971.

E doncas aquera annada, la còla de França devèva se n’anar en Africa deu Sud per sa virada d’estiu. Lo Roger i avèva sa plaça dempuèi 1969. Mes i avèva un problèma: Africa deu Sud vivèva devath lo regime vergonhós de l’Apartheid qu’interdisèva tot contacte entre raças, dens l’espòrt tanben. Un moment, cresèvi qu’Albert Ferrasse, lo president de la Federacion Francesa de Rugbí avèva trucat deu punh sus la taula per perméter a Bourgarel de vénguer jogar sos pena de boicòt de la virada, mes a la vertat, lo president de la federacion sudafricana, Danie Craven, èra un amic de Ferrasse e tanben un adversari de l’Apartheid.

Es atau que lo jogaire tolosenc vasoc, aus uelhs deus observators internacionaus, lo simbèu de la luta contra lo regime mès aule e execrable de la Tèrra. L’informacion apareishoc a la purmèra pagina deus jornaus en tot passar bravament l’esfèra de l’espòrt. Lo Tolosanec vasoc un eròi, un pauc a maugrat d’eth medish, mes sustot aus uelhs deus Negres deu país, qu’espiavan los encontres parcats dens las tribunas embarralhadas que’us èran atribuidas. Lo Roger s’en brembèc suu siti de France Info:

“Aquò’s hè part de mons grans plasers. Èi agut l’astre de mercar un essai a Johanesborg, tot escàs en fàcia de la tribuna reservada aus Negres. Lo sol inconvenient, es qu’èran entornejats de policièrs dambe cans. Quan èi mercat, an totis sautat. M’a esmavut, èi sentit qu’èri lo representant d’una nacion, la Nacion «negra» …”

Se ditz tanben que passèc l’òsca en tot prénguer un bus interdit aus Negres…

Africa deu Sud vivèva devath l’Apartheid, mes tanben sa còla de rugbí èra una de las mès rufas (benlèu la mès rufa) deu monde. Bourgarel receboc 7 punts de sutura au cap contra la còla deu Transvaal, e totis los jogaires tornèn nafrats. Joguèc dus test-matches. Marquèc un essai pendent lo purmèr, e estoc pres dens “la mès violenta castanha generala de l’istòria deu rugbí internacionau” pendent lo dusau.

Qué que sia, lo nòste Tolosenc demorarà coma estant lo purmèr esportiu negra que joguèc un encontre internacionau pendent l’Apartheid.