Bandièra01 1180x150: La Passem

Actualitats

InternacionalPoliticaSocietat

La justícia de Brasil a anullat las condemnacions contra Luiz Inácio Lula da Silva

Ara ten lo camin liure per se poder presentar a las eleccions presidencialas de la davalada que ven

Un jutge de la Cort suprèma del Brasil, Edson Fachin, a estimat un recors presentat e a anullat las condemnacions per corrupcion contra l’èx-president Luiz Inácio Lula da Silva. Segon Fachin, lo tribunal que lo jutgèt èra pas competent e l’imparcialitat de l’èx-jutge Sérgio Moro es mesa en question. Ara, l’anullacion de las senténcias de condemnacion contra el li daissan lo camin liure per se poder presentar a las eleccions presidencialas de la davalada que ven.
 
Incarcerat en abril de 2018, Lula quitèt la preson en novembre passat. Alavetz la Cort Suprèma de Brasil establiguèt que los condemnats podián pas començar a de complir lor pena abans que la senténcia foguèsse ferma.
 
Autant Lula coma lo Partit dels Trabalhadors considèran qu’es innocent e que son procès foguèt sonque una manòbra per empedir que tornèsse al poder a las eleccions de 2018, que s’impausèt fin finala Jair Bolsonaro, en seguida de la destitucion de la presidenta de Brasil, Dilma Rousseff; un “impeachment” qualificat per Rousseff e per qualques jutges brasilièrs de “còp d’estat parlamentari”.
 
 
De “damatges irremediables”
 
Mas tot es pas de bonas nòvas per Lula. Segon sos avocats, la decision del jutge Fachin "a pas la vertut d’adobar los damatges irremediables causats” per l’èx-jutge Moro. A mai, lo procuraire general, Augusto Aras, a anonciat que pausarà un recors a la decision del jutge Fachin
 
De lor caire, los partits de la drecha tradicionala an paur de demorar fòra de jòc dins una ipotetica eleccion presidenciala amb Lula e Bolsonaro coma candidats. Es, per tant, plan probable que persistisca la guèrra lorda contra Lula.
 
 
“Persecucion politica”
 
La condemnacion a la preson de Luiz Inácio Lula da Silva poiriá aver mancat d’imparcialitat. L’èx-president de Brasil èra encarcerat dempuèi abril de 2018 per blanquiment de fonzes e corrupcion, d’acusacions qu’ el a totjorn rebutadas en se disent victima d’una “persecucion politica”. A mai, The Intercept aviá revelat de convèrsas privadas entre lo procuraire e lo jutge que lo condemnèt que demostrarián que los procuraires conspirèron per que lo procès contra la corrupcion de l’afar Petrobras empachèsse lo retorn al poder de Lula e del Partit dels Trabalhadors.
 
 
 
 
 
 


abonar los amics de Jornalet

 

Etiquetas

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
2.

Un ome just calumniat e condemnat per los jutges venuts al capitalisme: Visca Lula e la luita trabalhadora en lo dia que las femnas de Russia acabaren amb lo regim del zar.

  • 4
  • 0
Franc Bardòu
1.

La justícia de Brasil a anullat las condemnacions contra Luiz Inácio Lula da Silva. Sembla donc plan mai avançada que non pas la justícia espanholista anticatalana e antibasca, malgrat lo mariòl que fa lo cap d'estat dins aqueste territòri malastruc…

  • 13
  • 2

Escriu un comentari sus aqueste article