Dijòus passat, lo sindic d’Aran, Carlos Barrera, faguèt una conferéncia de premsa a prepaus del referendum d’independéncia d’aqueste dimenge 1r d’octòbre. Lo sindic raportèt que lo ministèri public aviá fach sagelar tres locals del Conselh General d’Aran previstes coma burèus de vòte, çò que poiriá pausar de problèmas al vòte per las vilas d’Arties, Bossòst e Salardú. Barrera o raportèt amb resignacion e sens enveja de s’afrontar a l’estat, mas manifestèt son sosten a la libertat d’expression dels ciutadans araneses, tant dels que vòlon votar dimenge coma dels que o vòlon pas. Dins aquel sens, tanben declarèt qu’el voliá votar e que o fariá en tot “exercir eth sòn dret” dins lo burèu de vòte que li correspond.
 
Es verai qu’a la còla de Jornalet nos aguèsse agradat una autra reaccion mai coratjosa e determinada del sindic davant la menaça de l’estat. Mas volèm saludar sa determinacion davant las declaracions que qualques elegits del país avián fachas als mèdias espanhòls en tot ofrir un imatge absoludament espanholista de la Val d’Aran.  Barrèra mostrèt son chepic màger per las declaracions “fòrça preocupantas” qu’avián fachas lo secretari general d’Unitat d’Aran, Paco Boya, e lo cònsol màger de Vielha, Juan Antonio Serrano. “Aguesta forma tan leugèra d’etiquetar un país non ei aconselhabla”, çò diguèt lo sindic del temps que reclamava una campanha “a on se poguen deféner es pròs e còntres dera pertenença administrativa e geografica dera Val d’Aran en Catalonha o non”.
 
En tot saludar los mots del sindic d’Aran, voldriam tanben saludar la determinacion dels dos elegits araneses apelats davant la justícia per aver manifestat lor sosten al referendum. Se tracta de Jose Castet, cònsol màger de Vilamòs, e d’Emílio Medan, cònsol màger de Les. Aqueste es militant istoric d’Unitat d’Aran, mas son partit a pas levat lo pichòt det per lo defendre, ni mai prononciat un mot de sosten. De soslinhar que Medan es dels militants que fan pas partida del Partit Socialista espanhòl (PSÒE).