Aqueste dissabte 25 d’agost, serà una granda data dins l’istòria dels Dragons Catalans amb una segonda participacion a la finala de la Cup a Wembley. Aqueste còp, jogaràn contra los Lops de Warrington amb de  possibilitats mai fòrtas qu’en 2007 (desfaita 8-30 fàcia a St Helens), de tornar en Rosselhon amb lo trofèu.
 
 
Warrington, plaça fòrta del XIII
 
Lo club, nascut en 1876, fa partida dels primadièrs que fondan la Rugby League en 1895. A ganhat tres còps lo campionat anglés (1948, 1954 e 1955) e pres part 11 còps a la finala, e en particular a tres dempuèi l’espelida de la Superliga: 2012, 2013 e 2016 (desfaita 6-12 fàcia a Wigan). A tanben ganhat 8 còps la Cup (lo primièr còp en 1905; los darrièrs en 2009, 2010 e 2012). Joguèt la famosa finala de 1954: aprèp una partida nulla 4-4 contra Halifax a Wembley, Warrington ganhèt lo trofèu 18-4 a Bradford davant un public estimat a mai de 102 000 personas! A tanben perdut 9 finalas (la darrièra en 2016, fàcia a Hull FC: 10-12). Es doncas una formacion qu’a una brava experiéncia de las finalas que los catalans desfisan aqueste dissabte. Partida que se poirà seguir sus BeInSport, mas tanben comentada en catalan sus TV3 (partida a 4 oras del vèspre, a l’ora occitana)
 
 
Super-Uèit: las posicions se precisan
 
En campionat, dijòus, Saint Helens torna trapar lo camin de la victòria e va ganhar a Wakefield: 36-16. Divendres, Castleford bat Warrington 28-18 e fa un pas cap a a qualificacion per las mièjas finalas. Los Lops an solament 4 punts d’avança sus Huddersfield, victoriós 26-8 d’Hull FC. Los Gigants pòdon encara somiar d’agantar una plaça de miègfinalistas.
 
Dissabte, a Brutus, los Dragons avián ja lo cap a Wembley e daissan Wigan, amb l’èx-Dragon Morgan Escarre (dos ensages) e lo futur Dragon Sam Tomkins (5 transformacions e un tombat), lor i fa de misèrias: desfaita 6-35. Qualques jogaires catalans sortisson macats de la partida. Dissabte, caldrà jogar just e al 200 %!
 
 
8 del Mitan: Tolosa totjorn en corsa
 
Aqueste dissabte a Blanhac, Tolosa recebiá un autre pensionari del Championship: Halifax. Dins un primièr temps, los angleses dominèron, los occitans se mostravan malaisits mas opausavan una defensa de fèrre. Tres laucets lor i permetèron de marcar tres ensages coma aquel de l’alièr Centrone: partit dels 50 mètres, passa en diagonala en revista la mitat de la formacion anglesa per marcar dins lo canton opausat. Dins lo segond temps, los Blaus ajustan dos ensages e cal una fauta de man dels locals per qu’Halifax marque sus la fin. Victòria del Tolosa Olimpic: 28-6.
 
Lo 1r de setembre, reçaupràn a Blanhac de Vikings de Widnes mal adobats amb una desfaita a Salford: 6-32. Toronto plega fàcia a Hull KR: 22-28. Aprèp la victòria de Leeds a Londres (48-32), los tolosans se trapan en quatrena posicion al classament.
 
Cal recordar que los primièrs 3 seràn en Superliga l’an que ven, e que lo 4n e lo 5n jogaràn una partida de barratge per designar lo dotzen participant a la competicion bèla.
 
 
NRL: tres per doas plaças
 
Los Lapinons batuts a Brisbane 38-18 se fan doblar per la Tempèsta de Melbourne que bat amb dificultat Parramatta 20-4. En cap de classament, las doas formacions tenon 32 punts coma los Polets batuts a Canberra 14-12. La batèsta durarà fins a la darrièra jornada per conéisser las doas formacions qu’auràn l’astre de reçaupre pels barratges dins lo grop dels primièrs 4.
 
 
 
 
Alan Roch