Bandièra01 1180x150: Comuna de Tolosa

Actualitats

Rugbi de XIII: Saint Helens, primadièr de la fasa de classament

Pel Tolosa Olimpic, l’espèr (magrinèl) de montada en Superliga la sason venenta passa per una victòria fàcia a Hull KR aqueste dissabte 22 de setembre a Blanhac
Pel Tolosa Olimpic, l’espèr (magrinèl) de montada en Superliga la sason venenta passa per una victòria fàcia a Hull KR aqueste dissabte 22 de setembre a Blanhac

Es vengut lo temps de las decisions en Australia e en Superliga, alara qu’al país tornan prene aquesta dimenjada las competicions dels juniors e de l’Elèit 2.


Trucs e patacs a Wakefield
 
Es amb una esquipa formada en rason de l’abséncia de qualques nafrats que los catalans joguèron divendres de ser a Wakefield. Una partida sens gaire d’enjòc per las doas formacions mas que s’acabèt als trucs e patacs amb 2 generalas, 2 cartons jaunes pels angleses e lo roge pel pilar catalan Simon. Victòria de Wakefield: 34-22.
 
Dijòus, Castleford escartèt definitivament los Gigants d’Huddersfield de la perspectiva de las mièjas finalas: 44-12. Divendres, partida sarrada entre Wigan e Warrington: 8-6 a 5 minutas de la fin quand Wigan passèt la subremultiplicada per marcar tres ensages e ganhar 26-6. En batent Hull FC 38-12, Saint Helens s’assegurèt lo Bloquièr que recompensa la formacion que finís en cap de fila la fasa de classament.
 
Los Dragons Catalans rescontraràn Hull FC dissabte en Anglatèrra.
 
 
Tolosa èra pas luènh
 
Dins los 8-del Mitan, Tolosa jogava una partida decisiva a Toronto. La resulta es plan amara: un tombat encaissat a tres minutas de la fin e los occitans plegan de gaire 13-12. Demòran per l’ora en cinquena posicion e gardan la possibilitat de jogar la partida de barratge. Aquò vòl dire en primièr que cal batre Hull KR aqueste dissabte de vèspre a Blanhac. Hull KR, coma Leeds e Salford, son en camin de se manténer en Superliga la sason venenta.
 
 
Format cambiat
 
Las formacions de Superliga an decidit de cambiar la formula de la competicion l’an que ven, per balhar de vam a la competicion, çò dison. Fin del Super-8. Dotze formacions participaràn a la competicion: jogaràn 29 rescontres de classament: los 22 anar e tornarr, la Dimenjada Magica e 6 autres rescontres (Que seràn designats cossí? Mistèri per l’ora). Los primièrs 5 jogaràn las fasas finalas amb un sistèma (de mal explicar) qu’elimina una formacion a cada torn. Sol, lo darrièr davalarà automaticament en Championship. Serà remplaçat pel primièr d’un Championship que recamparà 14 esquipas.
 
 
NRL: De l’importància del tombat
 
En Austràlia, èra lo segond torn de las pelhòfas. S’i vegèt l’importància d’aquel pichon mespresat que val un sol punt: lo tombat, mas que pòt faire las diferéncias bèlas entre lo jorn e la nuèit, entre la qualificacion e l’eliminacion. Divendres, las Làmias de Cronulla menèron 18-2; las Pantèras de Penrith tornèron a egalitat 20-20 e un tombat de Chad Townsend assegurèt la victòria de Cronulla.
 
Dins la segonda partida, los Lapinons e los Dragons de Sant Jòrdi Illawarra èran a egalitat a 5 minutas del tèrme: 10-10. Lo dobertura dels Lapinons passèt un tombat, los Dragons repliquèron per una penalitat mas dos novèls tombats de Reynolds, lo darrièr a 20 segondas del tèrme, qualifiquèron los Lapinons que rescontraràn los Polets en mièja finala. L’autre rescontre farà s’arrapar Melbourne e Cronulla.
 
En mièja finala, divendres, lo campion 2017 reçauprà lo campion 2016: Cronulla e dissabte, novèla edicion del grand classic de Sydney: Polets contra Lapinons.
 
 
L’Elèit 2 repren
 
Al país, aquesta dimenjada, vei la represa de las competicions dels juniors e de l’Elèit 2.
 
En junior, la competicion comença per de grops qualificatius abans lo campionat bèl.
 
En Elèit 2, Tolon e Pià prendràn part a una competicion de 12 esquipas que lo club de Vilagalhenc-Argon aimariá plan de mestrejar per contunhar sul camin del doblat Copa-Campionat de l’an passat. De mai, cada formacion sómia de faire un percors bèl en Copa Lòrd-Derby. Per entamenar lo campionat, lo VARL reçauprà Lion aqueste dissabte de vèspre.
 
 
 
 
Alan Roch

 
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article