Los Pols de Sydney, campions NRL
 
En Austràlia, aqueste dimenge, se jogava la finala del campionat NRL que ramosèt 83 000 espectators dins l’ANZ-Estadium de Sydney. Ongan, la logica èra respectada: lo primièr de la fasa de classament, los Polets de Sydney, jogava contra lo segond qu’èra lo campion sortent: la Tempèsta de Melbourne.
 
De fait, i aguèt pas de partida, tant los Pols dominèron lor subjècte, en impausant lor ritme per marcar tres ensages dins lo primièr temps e menar 18-0. Dins lo segond temps, poguèron veire venir. Melbourne marquèt plan un ensag de 80 mètres sus intercepcion,mas en ajustant una penalitat e un tombat, lo trofèu podiá pas escapar a la formacion de Trent Robinson (ancian entraïnaire de Tolosa e dels Dragons), 5 ans aprèp lo títol de 2013.
 
Mençon especiala al menaire de jòc dels Pols: Cooper Cronk, que joguèt amb una espatla nafrada. Se decidiguèt just una ora abans la debuta del rescontre que seriá sus la pelena. Corriguèt pas gaire, evitèt los contactes, toquèt pauc de palmas mas a la votz replacèt de longa sos companhs, anoncièt las combinasons per prene una part bèla e decisiva a la victòria dels Pols.
 
 
David Mead se met en quatre
 
Dissabte, los Dragons jogavan lor darrièra partida de la sason amb la recepcion a Brutus dels Gigants d’Huddersfielfd. De gigants qu’avián pas l’intencion de se faire marchar suls pès e que marquèron d’entrada. Menavan 12-0 a la pausa. Los Dragons tenguèron còp un quart d’ora, Bird escampèt l’alièr anglés al darrièr moment en tòca e aquí, lo papó David Mead, plaçat a l’ala, dintrèt en accion en signant quatre ensages. Tres foguèron transformats per Lucàs Albèrt; Louis Anderson manquèt la darrièra. Es atal que o vòl la tradicion: un jogaire que s’arrèsta es convidat a tirar la darrièra transformacion. Mas coma David Mead aviá marcat dins lo canton… Victòria catalana: 22-12 que permet als Sang e Aur d’acabar en setena posicion, alara que lo club òbra a la mesa en plaça de la partida contra Wigan en junh que ven al Camp Nòu.
 
E ara, plaça a las mièjas finalas: dijòus, St Helens reçauprà los Lops de Warrington; divendres, los Tigres de Castleford aniràn desfisar Wigan. La finala se debanarà a Old Trafford (Manchester) lo dissabte 13 d’octòbre.
 
 
Tolosa, los uèlhs per plorar
 
Demorava una possibilitat magrinèla als tolosans de jogar la partida de barratge per montar en Superliga. Lo sol problèma: caliá anar batre Salford sus sa pelena. Los Diables Roges prenguèron los afars en man per menar lèu 14-0. Los occitans marcavan abans la pausa e just aprèp per tornar a 14-10. Mas aquí tenguèron pas còp e encaissèron una garlanda d’ensages per pèrdre 44-10 e replegar dins lor mocador lo sòmi bèl. Magra consolacion: l’arrièr Mark Keirralah es estat designat coma lo jogaire de l’annada del Championship.
 
L’an que ven, Leeds, Hull KR e Salford tornaràn trapar la Superliga; la dotzena plaça se jogarà dimenge entre Toronto e Londres.
 
 
Elèit 2: carton plen audenc
 
En Elèit 2, las tres formacions audencas an ganhat lor partida de la segonda jornada del campionat: Ferrals bat l’Escura 28-14; Vilanòva de Menerbés ganha a Selon 28-18 e Vilagalhenc-Argon a Entraigas: 41-16. Segonda victòria per Baò a Lion (22-18) e per Carpentràs a Tolon (28-25).
 
 
Los Blaus d’Elèit 1 en Serbia
 
Aquesta fin de setmana, dissabte, una esquipa de França formada de jogaires d’Elèit 1 anirà desfisar la formacion nacionala sèrba a Belgrad.
 
De notar que l’Estela Roja de la capitala sèrba s’es marcada a la Cup de l’an que ven amb l’espèr de jogar en League One en 2020.
 
 
 
 
Alan Roch