Solidaritat e festenal ofensiu a Domèc
 
A l’estadi Domèc a Carcassona, dissabte de vèspre, l’ora èra a la solidaritat: la recèpta dels rescontres, lo produit de la borricha, la mitat de las primas dels jogaires blaus remeses al fons de sinistrats audencs aprèp l’aigat bèl.
 
L’ora èra tanben a l’ofensiva: las francesas, amb una formacion plan jove, foguèron despassadas pel ritme de las anglesas: desfaita 54-4.
 
Puèi, pel compte a l’encòp de la Copa d’Euròpa e de la qualificacion per la Copa del Mond de 2021, los Blaus recebián los galeses. Los Pols imprimèron lor marca sul jòc amb autoritat e vam, amb eficacitat e esperit d’iniciativa; prenguèron lèu l’avantatge, mas coneguèron un moment mens fòrt a la fin del primièr temps: 26-12 pels Pols.
 
Lo festenal reprenguèt dins lo segond temps, amb l’arrièr Tòni Gigòt coma cap d’orquèstre: marquèt un ensag, ne transformèt 6 e passèt una penalitat per clavar lo planchòt sus una victòria 54-18.
 
D’aquel temps, Irlanda dominava Escòcia: 36-10. La partida de dissabte a Dublin serà decisiva per remportar lo trofèu e assegurar la preséncia en Anglatèrra en 2021. Lo 10 de novembre, retorn a Carcassona per reçaupre Escòcia, amb en dobertura l’oposicion femenina entre França e Itàlia.
 
 
Primièr episòdi pels angleses
 
A Hull, Anglatèrra recebiá los Kiwis neozelandeses per dobrir una tièra de tres tèstes. La partida foguèt d’un plan bon nivèl e plan engatjada. A la pausa, las doas formacions èran a egalitat 12-12. Dins lo segond temps, amb doas penalitats contra una, los Negres menavan 16-14 a l’ora de jòc. Una corsa de 60 mètres long de la linha de tòca del tres-quarts Gildart balhava la victòria als angleses 18-16. Revenge dimenge a Liverpool. De notar que los tres tèstes se pòdon seguir sus la cadena L’Équipe.
 
De l’autra part de la planeta, los Cavalièrs angleses (los Knights, l’esquipa espèr) bat la Papoa-Nòva Guinèa 16-12 dins lo primièr d’una tièra de tres rescontres.
 
De notar, la victòria en Austràlia dels italians contra la formacion de Niue: 36-32.
 
 
3 desfaitas audencas en Elèit 2
 
La cinquena jornada del campionat d’Elèit 2 foguèt pas favorabla a las formacions audencas. Sus sa pelena, Vilanòva de Menerbés se faguèt susprene dins lo primièr temps pels Lops de Roergue, e capitèron pas de tornar prene l’avantatge (31-28). Sul terren de la Grassa, Ferrals foguèt pas en mesura de contrar Pià (38-16). A Baó, la partida foguèt animada e Vilagalhenc finiguèt a 11 jogaires (dos cartons roges) e perdèt 26-20. Dimenge, se jogarà lo primièr dèrbi Vilanòva-VARL (luòc inversat en seguida de l’aigat que rend per l’ora indisponible lo terren de la formacion de Cabardés).
 
 
A la memòria de Robèrt
 
Aquesta cronica es dedicada a la memòria de Robèrt Rocalve, cavilha obrièra del Comitat d’Aude de XIII e votz de Radio Marseillette ont seguissiá particularament las partidas de Limós. De centenats d’amics lo menèron al cementèri de Ladèrn de Lauquet dimècres passat.
 
 
 
 
Alan Roch