Bandièra01 1180x150: Comuna de Tolosa

Actualitats

Rugbi de XIII: lo campionat d’Elèit 1 pren son vam

Aqueste dimars, Carcassona XIII organiza una quina bèla
Aqueste dimars, Carcassona XIII organiza una quina bèla

Aquesta dimenjada mòstra que lo campionat d’Elèit 1 serà ongan plan disputat. Qualques esquipas espèran encara de refòrts aprèp la pausa de Nadal, refòrts de qualitat que faràn encara pojar l’interès de las partidas.


Tròp dura la còrna de bison
 
A Avinhon, Carcassona cresiá de reüssir la bona operacion en menant 22-16 a una minuta del tèrme. Una improbabla pèrda de palma sus introduccion canari en mesclanha, un ensag provençal transformat sus la còrna e una intercepcion avinhonenca dins la prolongacion (22-26) tornava faire prene la direccion de Ciutat amb de regrèts la saca plena.
 
Dissabte, Palau tenguèt còp una orada a Sant Estève fàcia als Dragonets abans de pagar son indisciplina e l’engenh de Roman Franco que marca 3 ensages: 24-36. Albi se jogava de St Gaudenç: 26-10.
 
Dimenge, Lesinhan marcava d’entrada fàcia a Tolosa que gardava a distància: 48-28. A Vilanòva, Limós fa tanben la diferéncia en debuta de partida per s’impausar 24-12.
 
Per la quatrena jornada, en cap d’aficha, dissabte l’oposicion a Domèc entre Carcassona e St Estève-XIII Catalan e dimenge, al Pargue dels Espòrts d’Avinhon, la recepcion pels campions de França de Lesinhan. Polida aficha a l’Agulha tanben amb Limós-Albi. Lo dèrbi de Nauta Garona St-Gaudenç-Tolosa e la partida Palau-Vilanova completan aquel programa.
 
 
Elèit 2: primièra desfaita per Baó
 
En Elèit 2, a calgut esperar la novena jornada per véser pèrdre Baó: desfaita 33-32 a Carpentràs. Lo campion Vilagalhenc-Argon ganha a Tolon: 34-10. Ferrals domina Vilafranca: 29-10 e l’Escura venç fàcia a Vilanòva de Menerbés 36-12. Entraigas va ganhar aisidament cò del vesin Selon: 50-12.
 
Al classament, Baó demòra cap de fila amb 3 punts d’avança sul VARL e 4 sus Ferrals, Pià e Carpentràs.
 
 
Tròp fòrts los joves angleses
 
La formacion junior australiana es en virada en Anglatèrra. Aqueste dissabte, deguèron plegar fàcia als England Schoolboys: 14-8. Las doas formacions se tornaràn trapar divendres a Leeds.
 
 
Lo temps de las quinas
 
Per faire dintrar de moneda, los clubs organizan quinas. Atal, dins Aude, aqueste dimars, jol tibanèl de Domèc, Carcassona XIII organizarà la sieuna. Divendres, Vilanòva de Menerbés tirarà de numèros de la saca (o del bolièr) e, dimenge, es a Puègnautièr que Vilagalhenc-Argon espèra sos sostens.
 
Manjar un bocin pòt tanben ajudar a faire dintrar de moneda dins las caissas. Dissabte, aprèp la partida, a Carcassona, los Gaujoses Canaris vos prepausaràn un entraïnament de tria pels ressopets a venir: ustras, fetge gras e magret son al menut.
 
Diluns 17, lo pairin novèl de Carcassona XIII, Jiròni Ryon, cap estelat al restaurant de la Barbacana (Ostalariá de Ciutat), reçauprà los partenaris financièrs del club.
 
 
 
 
Alan Roch

 
 
 
 


abonar los amics de Jornalet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article