Pels clubs de XIII, la responsa a aquesta question: “Qual es lo mèstre del Mond?” serà balhada dimenge de ser amb la partida qu’opausarà en Anglatèrra lo campion de la Superliga Wigan e lo venceire de l’NRL: los Roosters de Sydney. Los australians, en preparacion a París, passaràn una jornada amb los jogaires del Tolosa Olimpic.

Tolosa que plora e Perpinhan que ritz…
 
Los tolosans auràn plan de besonh dels conselhs de lor ancian entraïnaire Trent Robinson aprèp una segonda desfaita en Championship. E aqueste còp sus lor pelena de Blanhac ont tenguèron pas la distància fàcia als Vikings de Widnes: desfaita 36-24. Serà plan ora dissabte de signar una primièra victòria amb la recepcion de Rochdale.
 
A Perpinhan, pel compte de la Superliga, menats de man de mèstre per un omnipresent Sam Tomkins, los Dragons metèron un quart d’ora a trapar lo bon ritme e per s’impausar als Gigants d’Huddersfield: 27-10.
 
Quatre formacions signan lor segonda victòria: los susprenents Diables de Salford, los Lops de Warrington, los Tigres de Castleford e Saint Helens ont Theo Fages s’es un còp de mai mes en evidéncia. En contra, quatre esquipas an pas ganhat una partida: Hull-FC, Wakefield, los Gigants e Leeds que clava lo classament.
 
Abans la partida per la corona mondiala, Wigan s’es rassegurat amb una victòria 34-16 contra Leeds.
 
 
Elèit 1: carton plen audenc
 
En Elèit 1, èra la fin de la fasa anar (levat las partidas en retard). Una jornada sens suspresa que vegèt los audencs s’impausar largament:
 
— a domicili, Limós daissèt a distància Tolosa 42-22
 
— a Palau, los locals poguèron pas res contra un Lesinhan reviscolat 4-42
 
— a Sent Gaudenç, amb l’integracion dels novèls arribats dels Antipòdes, Carcassona signèt 7 ensages per una victòria 40-10.
 
Lo campion Avinhon perseguís son camin de crotz amb una desfaita a Albi: 47-4.
 
Sola partida equilibrada, la que se debanèt a Vilanòva e que los Dragonets finiguèron que ganhèron 18-14.
 
Aquesta dimenjada, doas partidas permetràn d’anar cap a la mesa a jorn del calendièr: dissabte, Albi jogarà a Sant Estève e dimenge, a l’Agulha, serà l’ora del Grand Classic: Limós-Carcassona.
 
 
Elèit 2: un dimenge de Copa
 
Per las formacions d’Elèit 2, se jogavan los quarts de finala de lor Copa: lo Challenge Aillères. Se son qualificadas per las mièjas finalas doas formacions occitanas: lo tenent del trofèu, Vilagalhenc-Argon (victòria 44-0 a Tolon) e Vilafranca de Roergue; doas formacions catalanas: Baó e Pià.
 
 
Aborigèns e maòris
 
Aqueste divendres, en Austràlia, una partida opausarà una seleccion d’aborigèns d’Austràlia als representants dels maòris de la Nòva Zelanda, un afrontament a gost d’NRL.
 
 
Omenatge a Pèire Rayssac
 
Aquesta cronica es dedicada a la memòria de Pèire Rayssac, mòrt la setmana passada: un grand sénher, dirigent longtemps de l’AS Carcassona e secretari de la Federacion dins los ans 70 e 80, una memòria del XIII. Una pagina d’istòria se vira…
 
 
 
 
Alan Roch