Bandièra01 1180x150: Comuna de Tolosa

Actualitats

Espanha: d’eleccions legislativas anticipadas lo 28 d’abril

Lo president del govèrn espanhòl, Pedro Sánchez, a atacat amb duretat lo Partit Popular e Ciutadans per aver blocat son govèrn

Lo president del govèrn espanhòl, Pedro Sánchez, anoncièt ièr divendres la convocacion d’eleccions legislativas lo 28 d’abril venent. Après qualques jorns d’especulacions, lo govèrn d’Espanha a decidit de clavar la legislatura après que lo congrès dels deputats aguèt refusar d’examinar lo budget. “Entre contunhar de far pas res o donar la paraula als espanhòls, causissi la segonda opcion”, çò diguèt Sánchez.
 
Sánchez aviá la possibilitat de prorogar lo budget de son predecessor, Mariano Rajoy, e governar fins a l’an 2020, mas fin finala a preferit de liquidar la legislatura. Son govèrn aurà durat uèch meses.
 
La campanha d’aquelas eleccions legislativas coïncidirà d’a fons amb lo jutjament contra los politics independentistas catalans e amb las vacanças de Pascas. Per contra, la causida d’aquela data evita un superdimenge electoral lo 26 de mai, quand i aurà d’eleccions municipalas, europèas e de còps regionalas. Aquel jorn, los araneses tanben elegiràn lo Conselh General d’Aran.
 
Dins sa declaracion, Sánchez a fach un bilanç de l’òbra de son govèrn e a atacat amb duretat lo Partit Popular e Ciutadans. “Lo govèrn precedent aguèt totjorn la leialtat del PSÒE. Una leialtat que la drecha conservatritz a pas aguda amb aqueste govèrn”, çò declarèt. De mai, critiquèt que los partits de drecha se consagrèsson  a “perpetuar e tibar la crisi politica” en Catalonha.
 
Totun, evitèt de criticar l’independentisme e assegurèt que son executiu èra totjorn dobèrt al dialòg e a la negociacion. “Dins la Constitucion, sempre; en defòra de la Constitucion, jamai”, çò precisèt. Planguèt ça que la que l’independentisme aguèsse refusat de votar son budget perque èra una bona “fuèlha de rota sociala per Catalonha”.

 

 
 




abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Hilh
8.

#7 Aquò qu'ei la justícia e non Sanchez

  • 1
  • 2
Franc Bardòu
7.

#6 Fotre al tribunal d'elegits del pòble per delicte d'opinion, non apèli aquò "dialogar", mas préner l'autre per un ase !

  • 6
  • 0
Hilh
6.

#5 totun que s'ei posat mau dab eths dinc a que manifestèssin contra los sons ensajs de dialòg dab los indepe e que non votèssin lo son budgèt avantatjós endà Catalonha ( com los indepe) e mei sociau que los qui van arribar.

  • 1
  • 5
Francesc Palma
5.

Peire Sanchez es diguem un pauc covard, tamben dit galhineta, un politic com cal ha de tenir coratge, mas el sap pas qu' es açò, o potser que son partit sigan mai renegats qu' el, que tamben pot ser. La question es que non se volen pas posar malament amb la dreta facha e los dinerets que reparteissen los banquier mafiosos.

  • 6
  • 0
Hilh
4.

#3 pensi que los catalans ac saben mes ne'n vesen pas las consequéncias per'mor d'estar tròp escauhats peu procès. Lo PSOE que paga tanben la loa politica vergonhosa de las annadas passadas. Los sols qui son tostemps estats capius en aqueth ahar que son podemos mes que demoraràn minoritaris.

  • 2
  • 9

Escriu un comentari sus aqueste article