Bandièra01 1180x150: Comuna de Tolosa

Actualitats

Rugbi de XIII: Bonjorn, tristum a l’aficha de Brutus

En espòrt, la vertat d’un jorn demòra fugidissa. Tal que ganha un còp pòt pèrdre lo còp seguent

La sason passada, los tolosans perdèron quatre partidas contra Toronto. La primièra confrontacion de la sason se clava sus una victòria bèla dels occitans 46-16
La sason passada, los tolosans perdèron quatre partidas contra Toronto. La primièra confrontacion de la sason se clava sus una victòria bèla dels occitans 46-16 | Bernard Rieu
Los Diables amb mai de fuòc e de brasa que los Dragons
 
Los sostens dels Dragons Catalans ne son demorats palficats: cossí la formacion motivada e solidària de la victòria fàcia a Warrington es vengut aquel tropèl sens èime, sens nhac, de la defensa mòla, de las atacas magrinèlas, de la conviccion perduda. Resulta: los Diables Roges de Salford s’arregalan e arregalan lo public amb un jòc de movement menat de man de mèstre pel parelh de mièges Hastings-Lui. A la sortida, una vergonhosa desfaita pels Sang e Aur: 46-0, uèit ensages encaissats, pas un punt de rendut. La mai gròssa desfaita de lor istòria sus la pelena de lor estadi. De mai, lo talonaire Mac Ilorum se nafra e deuriá èsser absent un bon trimèstre. L’entraïnaire Mac Namara pren sus el la responsabilitat de la desfaita.
 
Dimenge que ven, desplaçament cò d’Hull KR qu’a ganhat a Wakefield una partida a un sol ensag: 10-6.
 
Los Dragons reçaupràn lèu l’ajuda d’un pilar de la NRL, en provenença de la Tempèsta de Melbourne, un gojat de 28 ans e de 128 kg, internacional samoan e neozelandés: Sam Kasiano. Mas una ironda ni mai un taure fan pas la prima!
 
La situacion es pas de las bonas tanpauc pel campion Wigan. An recuperat los dos punts perduts sul tapís verd en apelacion mas pèrdon a l’ostal fàcia als Gigants 14-6. Se trapan, amb Leeds e lor venceire del jorn, dins lo grop de 3 esquipas que clavan lo classament amb una sola victòria a lor actiu.
 
 
Ò Tolosa, mon rugbi…
 
Per aqueste rescontre contra la formacion canadiana de Toronto, lo Tolosa Olimpic aviá mudat a Tolosa, al terren de l’Estadi Tolosan. Remosèron atal un public de mai de 6000 personas. Lo primièr temps foguèt dominat pels Lops que menavan 16-6. Dins lo segond temps, los occitans alinhèron 40 punts sens ne prene un sol! Victòria 46-16. Es la primièra desfaita de la sason pels canadians que demòran caps de fila al classament perseguits, a 2 punts, per 4 formacions que Tolosa ne fa partida amb Sheffield, York e Halifax.
 
Retorn a Blanhac aqueste dissabte 16 de vèspre per reçaupre los Barrow Raiders amb dins l’idèa una cinquena victòria en seguida.
 
 
Dòna Copa jòga la carta de la logica
 
Aquesta dimenjada, se jogavan los 8ns de finala de la Copa Lòrd Derby. Las resultas respèctan la logica e los emplegats dels planchòts an tengut plan de trabalh.
 
Las partidas las mai sarradas opausèron de formacions d’Elèit 1. Los catalans deguèron esperar lo darrièr quart d’ora per ganhar a St Gaudenç 46-30. Sus sa pelena, Albi met a profièit las darrièras 5 minutas per marcar un ensag transformat e una penalitat e eliminar Vilanòva 14-12. Limós s’impausa a Tolosa 38-16.
 
Dins las oposicions Elèit 1 contra Elèit 2, Lesinhan ganha aisidament a Vilafranca 58-0, alara que Pià opausa una bèla resisténcia a Palau dins lo dèrbi catalan: 14-44. Dins las oposicions entre Elèit 2, Carpentràs se va qualificar a Lion tre dissabte 24-12 e, dimenge, Vilagalhenc-Argon es sens pietat per Entraigas: 84-6.
 
La batèsta èra tròp desequilibrada entre Carcassona (Elèit 1) e Trentèls (Nacionala 1): los Canaris s’impausan en país agenés en passant la barra dels cent punts: 104-4.
 
 
Per una plaça dins los 6
 
Dins la jornada de campionat d’aquesta dimenjada, òm seguirà l’afrontament entre St Gaudenç e Albi, entre Orses e Tigres que son en competicion per dintrar dins los 6 clubs qualificats per las pelhòfas.
 
Los 3 clubs audencs son favorits: Carcassona a Domèc fàcia a Avinhon, dissabte en fin de vèspre; Limós, a l’Agulha, contra Vilanòva; Lesinhan en desplaçament a Tolosa.
 
Lo dèrbi catalan Palau-Dragonets completa lo programa de la dimenjada.
 
En Elèit 2, dimenge de vèspre, lo primadièr Baó se desplaça en Cabardés per afrontar son segond: Vilagalhenc-Argon. E coma dins los albums d’Asterix, un singlar serà dins las sietas pel tresen mièg temps!
 
 
La represa en NRL
 
Mas l’eveniment bèl de la setmana serà la represa del campionat australian de la NRL; retorn a las vertats del terren aprèp de meses ont s’es mai parlat de tranferiments, de respècte de las limitacions de las massas salarialas o del comportament dels jogaires dins la vida vidanta.
 
Qual per succedir als Roosters-Polets? Eles meteisses? Benlèu pas que, dempuèi la naissença del campionat NRL (1998), cap de campion tornèt pas ganhar l’annada seguenta …
 
Las 8 partidas son repartidas sus quatre jorns. L’annada la dobrirà l’afrontament entre Melbourne e Brisbane dijòus. Divendres, grand dèrbi de Sydney entre los Polets e los Lapinons. Cada setmana, de partidas se pòdon seguir sus BeInSport.
 
 
 
 
Alan Roch
 
 
 
 
 
 


abonar los amics de Jornalet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alan Roch
3.

Cronica represa sus :
• Ràdio-Lenga d'Òc-Erau : radiolengadoc.com
Rugbi a XIII amb Alan Rouch, cada dimars a 10°30,
puèi podcast

• Ràdio-Lenga d'Òc-Narbona :mai d'una difusion dins la setmana

  • 3
  • 0
IEO-Aude
2.

Diluns 18 de març, a cinc oras del vèspre, a la Comuna de Traussan de Menerbés, intervencion d'Alan Roch sul tèma [i]« Occitan e rugbí ».00]]
Un agach de la pre-istòria a uèi, dels dinosaures als Dragons, tot çò que cal saber sus las evolucions dels jòcs de la pauma ovala e en particulièr sul rugbí de XIII. Entre informacions seriosas e rampèls de la riquesa lexicala de la lenga nòstra pertocant lo rugbí, serà tanben presentat l'obratge collectiu : Lo XIII, aquò òc !

  • 1
  • 0
Mèfi! 31
1.

Cal apondre le ligam de la version ràdiofonica...

  • 1
  • 0

Escriu un comentari sus aqueste article