Superliga: los Dragons sul corrent alternatiu
 
Aviam daissat los catalans la setmana passada sus la pietadosa desfaita a Brutus 46-0 fàcia a Salfòrd. Aqueste dimenge, cò d’Hull KR, amb Lucàs Albèrt titularizat (enfin) al talonatge e que marquèt un ensag, las causas foguèron complicadas pels catalans qu’encaissèron un ensag de 90m sus intercepcion a un quart d’ora del tèrme, mas, a la 75a minuta, un còp de pè a ras de pelena de Langi permetiá a Tierney de puntar l’ensag e a Tomkins de passar la transformacion de la victòria 18-16.
 
Dissabte, a Brutus, reçaupràn los Rinocèros de Leeds que son l’ombra d’eles meteisses: avantdarrièr al classament aprèp una novèla desfaita sus sa pelena fàcia a Londres 18-16. Las causas se melhoran pas pel campion Wigan, batut pels Lops de Warrington: 25-12.
 
 
Tolosa sus una nívol
 
Aprèp la victòria bèla fàcia a Toronto de la setmana passada, los tolosans confirman fàcia a Barrow amb un 50-0 a la clau e s’installan a la segonda plaça al classament, dos punts darrièr Toronto. Dissabte que ven, los occitans aniràn desfisar la formacion de Batley, onzena al classament.
 
 
Avinhon, bèstia negra dels Canaris
 
En Elèit 1, suspresa aqueste dissabte de ser a Domèc ont lo campion Avinhon, qu’aviá pas ganhat una partida dempuèi decembre e que puntava en fin de classament, venguèt batre Carcassona 19-16.
 
Dimenge, mercé a un segond mièg temps executat amb vam, Lesinhan ganhèt a Tolosa 50-20, alara que Limós batiá sens convéncer Vilanòva 20-12. Los Dragonets agèron de dificultats per anar ganhar lo dèrbi catalan a Palau del Vidre 32-24, alara qu’Albi dominèt largament los Orses de Sent Gaudenç: 48-18.
 
Coma cap d’aficha del programa de la dimenjada venenta, l’afrontament a Brutus, en dobertura de la partida dels Dragons, entre los dos caps de fila: Dragonets e Carcassona.
 
 
Aqueste còp, èra per Cabardés…
 
En Elèit 2, la partida entre los primièrs dos, a Vilagalhenc, virèt en favor dels jogaires de Cabardés: victòria fàcia a Baó 28-22.
 
 
NRL: los Lapinons son en cambas…
 
Dijòus, la primièra victòria de la sason foguèt per la Tempèsta de Melbourne fàcia als Bròncos de Brisbane: 22-12. Divendres, los Lapinons ganhèron lo dèrbi de Sydney fàcia als campions Roosters-Polets: 26-16. Dissabte, los Combatents Neozelandeses passèron un 40-6 als Dògols de Canterbury.
 
Al programa de la segonda jornada, se seguiràn particularament los rescontres Dragons de Sant Jòrdi contra los Lapinons (dijòus) e lo dèrbi de Queensland entre Bròncos e Vaquièrs (divendres).
 
 
E la joinesa se prepara…
 
E aqueste dimenge 24 de març, a Carcassona, l’Ostal dels Joves (MJC XIII) organiza lo Challenge Grégoire que recampa los participants e participantas de las escòlas dels joves del XIII: los U7, U9, U11 e U13.
 
 
 
 
Alan Roch