Superliga: lo quadruplat de Yaha
 
Leeds es actualament en darrièra posicion del classament, mas segur que traparà los mejans de tornar prene vam. Aquò lo manquèron de gaire a Brutus, ont, mercé a doas intercepcions, menèron 12-0 facia als Dragons. Lo pilar, nòuvengut, Sam Kiasano tornèt metre los catalans dins lo sens de la marcha. Las doas formacions èran a egalitat a la pausa, aprèp dos ensages de Foad Yaha e un ensag de talonaire de Lucàs Albèrt al ras del tengut. Los catalans trapèron dos còps de mai la solucion sus l’ala esquèrra per permetre als Sang e Aur de ganhar 26-22.
 
Warrington coneguèt de dificultat dijòus per ganhar a Wakefield 34-32. Divendres, Saint Helens contunha sus sa lançada: victòria 24-12 a Castleford. Los Gigants passan un 42-8 a Hull KR. Dimenge, doas victòrias a l’exterior: la d’Hull FC a Londres 28-24 e de Wigan a Salford 30-22.
 
Dimenge de vèspre, los Dragons aniràn desfisar Wigan, los campions que tornaràn trapar lo dimenge 18 de mai sus la pelena del Camp Nòu a Barcelona.
 
 
Championship: Tolosa en forma
 
En Championship, novèla victòria del Tolosa Olimpic del costat de Batley: 38-12. Los occitans an un quinzenat de jorns per preparar la venguda de Featherstone a Blanhac lo dissabte 6 d’abril de vèspre.
 
 
Elèit 1: de l’eficacitat de brandir las pelhas
 
Los Canaris s’èran fait remontar las bretèlas per l’enquadrament aprèp la desfaita fàcia a Avinhon per manca de solidaritat defensiva e d’imaginacion ofensiva. La leiçon foguèt retenguda e aqueste dissabte, a Brutus, Carcassona capitèt un segond mièg temps de fuòc per faire plegar los Dragonets 36-12. En serada, Limós se revelhèt tròp tard e perdèt a Albi: 36-24. Baissa de ritme pels Orses de St Gaudenç qu’encaissan un 42-10 a Tolosa. Vilanòva se rapròcha de la qualificacion per las pelhòfas amb una victòria 40-34 fàcia a Palau mercé a un ensag dins las darrièras minutas. Dimenge, Lesinhan resistís dins lo segond temps al retorn d’Avinhon 28-20.
 
 
Elèit 2: e Pià bat Baó
 
En cap d’aficha de la jornada d’Elèit 2, lo dèrbi catalan se clava sus la victòria de Pià sul cap de fila Baó: 21-20. Vilagalhenc-Argon se deu emplegar per ganhar lo dèrbi audenc fàcia a Vilanòva de Menerbés: 42-34. Amb una victòria sus Selon 26-18, Ferrals demòra en corsa per la 6a plaça qualificativa per las pelhòfas.
 
 
NRL: los Lapinons mancan pas de vam
 
Los Lapinons son en forma en aquesta debuta de sason australiana: van ganhar cò dels Dragons de Sant Jòrdi: 34-18. Quatre autras formacions ganhan al defòra: Melbourne a Canberra 22-10, Penrith a Newcastle 16-14, los Polets de Sydney cò de las Aglas de Manly 26-18 e Parramatta a Canterbury 36-16. Brisbane ganha 29-10 fàcia als Vaquièrs lo dèrbi de Queensland.
 
 
Dimenjada de Copa
 
Aquesta dimenjada se debanaràn los quarts de finala de la Copa Lòrd-Derby amb doas oposicions Elèit 2/Elèit 1: Carpentràs-Dragonets e Vilagalhenc-Argon contra Lesinhan. Los dos autres quarts faràn s’arrapar de formacions d’Elèit 1: Albi-Carcassona e Palau-Limós.
 
 
Pagina d’istòria
 
Dins l’encastre de la manifestacion tarnesa Rugbimages, un collòqui istoric se tendrà aqueste dijòus 28 de març a Castras sul tèma: “Lo rugbi pendent la seconda guèrra mondiala (1939-45)”. Tres intervencions ritmaràn la jornada: “Lo rugbi gasogèn” de matin; a 2 oras de l’aprèp-dinnar, Robert Fassolette tornarà sus l’espoliacion dels XIII; enfin, Marianne Lassus evocarà los que sostenguèron Vichèi e los que causiguèron lo maquis.
 
 
 
 
Alan Roch

 
 
 



 
 
Imatge: