Bandièra01 1180x150: Comuna de Tolosa

Actualitats

InternacionalPolitica

An destituit Quim Torra coma president de Catalonha e an decidit de manténer Junqueras en preson en li retirar la condicion d’eurodeputat

La Comission Electorala espanhòla a decidit de far venir inelegible lo president de la Generalitat en foncions e de mancar a la decision de la Cort de Justícia de l’Union Europèa a respècte de Junqueras

La Comission Electorala espanhòla ordenèt ièr de ser la destitucion del president de la Generalitat en foncions, Quim Torra, e que li foguèsse levada la condicion de deputat del Parlament de Catalonha. O faguèt en seguida d’un recors pausat pels partits de la drecha e de l’extrèma drecha espanhòlas, lo Partit Popular, Ciutadans e l’ultradrechista Vox. La Comission Electorala a davançat la decision de la Cort Suprèma: aquesta deu estudiar lo recors de l’avocat de Torra a prepaus de la decision de la Cort de Justícia de Catalonha que lo condemnèt a l’inelegibilitat per aver mantengut sul balcon del palais de la Generalitat una bandeiròla que demandava la libertat dels presonièrs politics, mentre que la Comission Electorala de l’estat espanhòl o li aviá enebit.
 
Ara aquela Comission Electorala a dich que cal daissar sens efièch la condicion de Torra coma deputat del Parlament de Catalonha e a transmés l’òrdre a la Comission Electorala de Barcelona per qu’aplique aquela inelegibilitat sul pic.
 
Qualques minutas puèi, aquela Comission decidiguèt de retirar la condicion d’eurodeputat a Oriol Junqueras e de lo manténer en preson e mai lo president del Parlament Europèu, David Sassoli, exigiguèsse de las autoritats espanhòlas qu’executèsson la senténcia de la Cort de Justícia de l’Union Europèa en Luxemborg que reconeissiá l’immunitat parlamentària de l’elegit e presonièr politic catalan.
 
Un ponch polemic lo moguèt la reaccion del cap del Partit Popular, Pablo Casado, qu’aviá publicat sus Twitter la decision de la Comission electorala qualques minutas abans qu’aquesta l’aguèsse comunicada.
 
D’esperar las reaccions de las institucions europèas.
 
 
Lo Parlament de Catalonha decidirà sul sòrt de Torra
 
Ara lo Parlament de Catalonha decidirà s’obesís a aquela decision o se defend lo president Torra. La majoritat dels partits del Parlament an manifestat lor sosten a Torra. Solament lo PP amb 4 deputats sus 135 e Ciutadans amb 36 votarián per la destitucion del president. Demòra de veire quina serà la posicion del Partit Socialista (17 deputats),  après l’acòrdi amb Esquèrra Republicana de Catalonha per que Pedro Sánchez pòsca èsser president del govèrn espanhòl.
 
De soslinhar que lo Parlament de Catalonha aviá ja demandat a la Comission Electorala que refusèsse los recorses en favor de l’inelegibilitat de Torra. Lo president de la cambra, Roger Torrent, precisèt qu’aquela sòrta de questions las deviá resòlver lo Parlament del temps que se remarcava divèrsas incompatibilitats de las decisions d’aquela Comission Electorala amb las foncions que, segon la lei, ten lo Parlament. Cossí que siá, lo Parlament considèra qu’es pas la Comission Electorala de l’estat espanhòl que deu resòlver l’afar car es un subjècte que pertòca pas lo regim electoral.
 
 
Reaccions
 
Las reaccions sul ret en sosten a Torra arribèron sul pic e son nombrosas. De soslinhar la fiulada sus Twitter del president en exili, Carles Puigdemont, que precisa que los darrièrs dos presidents de Catalonha los a destituits l’estat e non pas lo Parlament. “Se son acostumats a decidir qui deu èsser president e qui non. Pro”.
 
Long de tot Catalonha e Aran i aguèt d’acamps de sosten al president del temps que se teniá una reünion d’urgéncia al Palais de la Generalitat.
 
L’editorial de Vilaweb qualifica la decision de “còp d’estat contra la Generalitat” de Catalonha, assegura que “la polverièra a espetat” çò qu’es una “granda oportunitat” per l’independentisme catalan, mai que mai quand Espanha a decidit de desobesir a la justícia europèa.

 
 



 
 
 
 
 
 
 
 


 
abonar los amics de Jornalet
 
 

 

Etiquetas

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
3.

La Junta electoral de Catalunha, composta per membres de pp, te molta comandera e se crese ser lo que fa i desfà coma e quan li dona la gana. E non es pas un tribunals.

  • 7
  • 0
Pitaluga
2.

E ERC acceptarà aquò? Facilitaràn la plaça de President del Govèrn al Pedro Sanchez?

  • 8
  • 4
Guilhem Pujol
1.

Fàcia a n aquel novèl cop de força d'Espanha contra Catalonha, quinas seran las reaccions de las institucions europencas ? Ço que foguèron en Octobre 2017 : agachar prudentament endacom e tornar recitar diplomaticament qu'aquo's un afar intern a Espanha. Qui pot creire seriosament qu'Europa maastrichiana vai forabandir Espanha o li faire la guèrra perque pissa sus tala o tala decision venguda
de Brussèlas o Luxemborg ? D'Orban a Poutine en passant per Rajoy e Erdogan fa bèl temps que lo mond s'es trachat de ço que valia concrètament "la potència de fuoc" de las institucions europencas. Un polit molin de paraulas sofisticadas, idealistas e nècias per mascar l'impotència e la covardesa d'un poder d'operèta.

  • 12
  • 0

Escriu un comentari sus aqueste article