Bandièra01 1180x150: Comuna de Tolosa

Actualitats

Bangladèsh a començat de remandar de refugiats rohingyas sus una illa inondabla

L’ÒNU e HRW critican lo plan e ne demandan l’arrèst. Lo govèrn bangladèshi ditz que la situacion sul camp de Cox’s Bazar es insuportabla e a ja remandat 1640 refugiats sus l’illa

| Media India Group
Bangladèsh a entamenat son plan de remandar 100 000 rohingyas sus l’illa de Bhasan Char. Situada dins lo golf de Bengala, es una illa acantonada del dèlta del Ganges, fins ara desabitada, que s’inonda fòrça sovent, sustot pendent la sason de las pluèjas. D’organizacions umanitàrias coma Human Rights Watch (HRW) an exigit l’arrèst immediat d’aqueles desplaçaments a causa de las marridas condicions de l’endrech.
 
Un primièr grop de 1640 refugiats rohingyas es ja estat installat sus aquela illa. Los an menats del camp de refugiats de Cox’s Bazar; aqueste, lo pus grand de la planeta, aculhís 738 000 d’aquela comunautat musulmana que fugiguèt Birmania fa tres ans per una persecucion militara qu’assassinèt 22 000 rohingyas. Las transportacions de personas sus l’illa de Bhasan Char se comencèron de far secretament fins que las organizacions umanitàrias o denoncièsson.
 
Lo govèrn de Bangladèsh assegura que i a pas cap d’alternativa car la situacion dins lo camp de Cox’s Bazar es insuportabla. L’executiu afirma que l’illa de Bhasan Char ten las installacions necessàrias per aculhir los refugiats e que los desplaçaments son volontaris. Per contra, las organizacions umanitàrias asseguran que los desplaçaments son forçats e qu’an devesit de familhas.
 
Las autoritats de Bangladèsh an ensajat de remandar los rohingyas sus l’illa de Bahan Char tre qu’arribèron en 2017, mas l’ÒNU o empachèt. Ara, exigís que las transportacions sián volontàrias e deplora la manca d’informacion en tot assegurar qu’an pas participat a l’operacion ni quitament a l’identificacion dels refugiats.


La minoritat mai secutada del Mond
 
Lo pòble rohingya, de fe musulmana dins un país de majoritat bodista, es objècte d’una persecucion sistematica dempuèi d’annadas. Lo sit Rohingya Vision ofrís d’informacions sul patiment d’aquel pòble e en causa d’aqueles faches, Amnestia Internacionala considèra los rohingyas coma la minoritat mai secutada del Mond.
 
E mai se qualques istorians los considèran coma los descendents dels comerçants e dels soldats arabis, bengalins, mongòls e turcs convertits a l’islam al sègle XV, las autoritats birmanas considèran que los rohingyas arribèron al país amb la colonizacion britanica, al sègle XIX, en provenença del país vesin de Bangladèsh. En luòc d’èsser reconeguts coma una de las 135 etnias nacionalas de Birmania (las presentas dins lo país abans l’arribada dels britanics en 1823), lo govèrn birman los a sovent tractats d’immigrants illegals. E encara pièger: dempuèi 1982, amb la lei de ciutadanatge de la dictatura militara, son oficialament “apatridas” dins lor país.
 
Per obténer lo ciutadanatge, lor cal demostrar que son demorats en Birmania pendent seissanta ans, mas normalament òm lor concedís pas de contractes de trabalh ni de papièrs e, doncas, i pòdon pas accedir. Sens ciutadanatge, los rohingyas pòdon pas intrar dins lo sistèma educatiu birman, ni viatjar liurament. Patisson tanben la persecucion dels extremistas birmans bodistas, que los atacan pr’amor que son musulmans. De desenats de milièrs de rohingyas, long dels darrièrs decennis, son estats desplaçats dintre Birmania o lor a calgut fugir cap a Bangladèsh. Dempuèi qualques ans, un dels mejans per s’escapar es de prene de naviris per ensajar d’arribar a las còstas de Tailàndia, Malàisia e Indonesia.

Aquestes darrièrs decennis, la terribla situacion dels rohingyas, agravada per d’esclataments periodics de violéncia contra eles en provenença de la majoritat bodista de Birmania (coma en 2012, que daissèron mai de dos cents mòrts e de desenats de milièrs de desplaçats), a provocat que fòrça d’eles fugiscan lo país: siá vèrs Bangladèsh, al nòrd, siá mai recentament vèrs Malàisia, Indonesia e Tailàndia, malgrat los grands perilhs de las traversadas maritimas per i arribar. Dins las darrièras tres annadas soletas, l’Agéncia de l’ÒNU pels Refugiats calcula que mai de cent mila rohingyas an ensajat de pervenir dins aqueles païses.
 
 

 
 



abonar los amics de Jornalet

 

Etiquetas

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article