Bandièra01 1180x150: Comuna de Tolosa

Actualitats

Un programa de l’UE a format e esquipat de milièrs de policièrs de Birmania

Auriá ensenhat a mai de 4500 policièrs de Birmania “la gestion de las molonadas, las enquistas criminalas e lo dialòg amb las mèdias e los deputats”

Tèxte legit

Un programa de l’Union Europèa a format e esquipat de milièrs de policièrs de Birmania, acusats de cometre tota sòrta d’abuses contra los manifestants pròdemocracia, çò revelèt Libération dijòus passat. Sonat Mypol e finançat amb 40 milions d’èuros, lo programa cercava de “transformar” la polícia de Birmania e de la formar segon las “melhoras practicas internacionalas e lo respècte dels dreches umans”. Lo programa Mypol èra dirigit per l’organisme espanhòl Fondacion Internacionala e per Iberoamerica d’Administracion e Politicas Publicas (FIIAPP), e recebèt lo sosten de païses europèus coma França, Alemanha, Irlanda o Soïssa.
 
Aviat en 2016 a l’arribada al poder d’Aung San Suu Kyi, lo programa europèu auriá ensenhat a mai de 4500 policièrs de Birmania “la gestion de las molonadas, las enquistas criminalas, e lo dialòg amb las mèdias e los deputats”. A mai, lor forniguèt “de material de defensa” dont “plusors milièrs de cascos, de bloquièrs e de cambièras, pendent la fasa pilòt del programa”.
 
La collaboracion europèa amb la polícia birmana finiguèt lo 1r de febrièr passat, en seguida del còp d’estat militar. A partir d’alavetz, la polícia d’aquel país a tuat, segon d’associacions umanitàrias internacionalas, aperaquí 730 personas que manifestavan contra lo putsch. Demest los mòrts i a d’enfants.
 
“Vòli pas culpabilizar los europèus, mas foguèt un pache amb lo diable”,çò ditz l’èx-deputat Maw Htun Aung, a Libération. Lo jornal soslinha que la formacion se faguèt “amb discrecion absoluda, per daissar pas cap de traça, coma s’aguèsse pas jamai existit”. De fach, après lo còp d’estat, la pagina Facebook del programa Mypol a desaparegut.
 
 
Genocidi dels rohingyas
 
Mas abans lo còp d’estat militar, la polícia birmana aviá ja exercida una violéncia murtrièra. Ja en 2017, jos la presidéncia d’Aung San Suu Kyi e durant los primièrs ensages del programa Mypol, las fòrças armadas birmanas avián perpetrat lo genocidi dels rohingyas, qu’Amnestia Internacionala considèra coma la minoritat mai secutada del Mond.
 
De soslinhar tanben que lo govèrn democratic d’Aung San Suu Kyi se serviguèt tanben de sa polícia per impausar l’installacion de las multinacionalas qu’esplechan las ressorsas minièras e la man d’òbra a bas còst dins l’indústria textila.

 


 
abonar los amics de Jornalet

 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pitaluga
3.

França a l'abituda de formar los policièrs e los militars de las dictaturas. Qu'o demanden als tunisians amb l'Alliot-Marie que volguèt salvar lo Ben Ali. E parlèm pas dels genocidis cobèrts per l'armada francesa, ni de la venda d'armas a de govèrnaments assassins.

  • 5
  • 0
francesc palma
2.

I a los criminals militars golpistas de Birmania e i a tamben los qu' ajudan a aquestas dictaduras des d'Europa .Los militars son pas de fiar ni allà ni d'aquí.

  • 3
  • 0
Franc Bardòu
1.

Per la téoria, Euròpa ultraliberala : per la practica, passar far un estagi d'observacion en Birmania. E après ?

  • 3
  • 0

Escriu un comentari sus aqueste article