Bandièra01 1180x150: País Invisible

Actualitats

L’ÒNU a reconegut lo drech a l’independéncia per lo pòble de la Polinesia Francesa

L’Assemblada Generala de las Nacions Unidas aprovèt divendres passat una resolucion per la futura descolonizacion de la Polinesia Francesa: qu’a mes l’accent sus “lo drech dels polinesians a l’autodeterminacion e l’independéncia” a respècte de França.


Aital, l’ÒNU apond la Polinesia Francesa a una lista dels 16 territòris qu’an intencion de se descolonizar, e doncas la Polinesia Francesa a drech d’aver sas institucions pròprias al delà de París.
 
Aquel eveniment provoquèt lo refús de las autoritats francesas. Lo ministre francés dels Afars Exteriors, Philippe Lalliot, diguèt dins un comunicat qu’“aquela resolucion es una ingeréncia flagranta, una completa manca de respècte per las eleccions democraticas dels polinesians, un desviament dels objectius que las Nacions Unidas se fixèron en matèria de descolonizacion”.
 
La resolucion de l’ÒNU, presentada per tres petits estats del Pacific —las Illas Salamon, Nauru e Tuvalu—, foguèt adoptada per consens dins una session que França i participèt pas per fin de protestar.
 
Lo nòu govèrn polinesian a ensajat d’estancar aquela demanda de descolonizacion après la victòria dels autonomistas suls independentistas.

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

pessamessa siverga
2.

Perdon ! la populacion deisl vintenas d'Illas Salomon n'ei soncament de 500 000 abitants segons l'enciclopedia universalis , ai ajustat un 2, tanben, podriàu citar lo reiaume de Tonga 270 km2 ambe 100 000 abitants e una vintena d'autres estats liliputians que votan per governar aquéu monde globalizat per cu totei leis estats se valon democraticament quora s'agis de descolonizar, mai que reclamaran jamai l'independéncia de Catalonha o d'Euskadi....

  • 2
  • 0
pessamessa siverga
1.

la planeta terra es ben mau governada, Nauru e Tuvatu 27 km2 10 000 abitants ambé leis ilas Salomon 28 570 km 2 500 000 abitants possedon a l'ONU una votz coma la China, l'India o la França e fan votar una resolucion que demandan l'indpendéncia de la Polinesia que ven precisament de far una votacion contrari , l'independéncia ? vist lei sous e lei subvencions consequentas que recebon lei territoris d'outra-mar, qu'aquelei demandèsson l'indpendéncia releva puslèu d'una figura de retorica que d'autra causa. Maiota a vougut restar francesa pèr profichar de la generositat sensa limits dau contribuable francés

  • 2
  • 1

Escriu un comentari sus aqueste article