Torna La Passem, la corsa per la transmission de la lenga occitana ara amb un percors de 1100 km en 6 jorns e 5 nuèches entre Tarba e lo Mont de Marsan. L’edicion 2024 se tendrà del 30 d’abril al 5 de mai, çò presentava la còla de Ligams dimars passat dins una conferéncia de premsa.

L'organizacion d’aquela corsa per la lenga es possibla gràcias a l'esfòrç de mai de 200 benevòls e de divèrsas comissions. L’eveniment a una tièra d’activitats prèvias e implica la venda de quilomètres per amassar de fonzes.

La Passem es un eveniment màger per la transmission de la lenga que pòrta la mobilizacion generala dins totas las vilas e vilatges que travèrsa e emplena d’animacions. La primièra edicion de La Passem aguèt luòc amb grand succès en 2018 e arribèt d’amassar 48 000 èuros que financèron uèch projèctes per la lenga occitana, abans que la segonda corsa collectèsse 67 000 èuros. Tot aquel argent s’es despartit entre divèrses projèctes en favor de l’occitan.