Bandièra01 1180x150: País Invisible

Actualitats

Rumans: “La carrièra, França, nos apertenon”

L’ultradrecha se servís del crime de Crèpôl per menar una campanha virulenta contra los migrants

Rumans: manifestacion ultradrechista: “la carrièra, França, nos apertenon”
Rumans: manifestacion ultradrechista: “la carrièra, França, nos apertenon”

Tèxte legit

Dissabte passat, unes 80 militants ultradrechistas se passegèron amb violéncia a Rumans en exigissent: “Justícia per Thomas, ni perdon ni oblit”. Aquela razzia seguís la mòrt tragica d’un licean de 16 ans, tuat dins un bal dins la vilòta arpitana de Crèpôl fa una setmana.

Los manifestants, encagolats e vestits de negre, cridavan “la carrièra, França, nos apertenon” en caminant dins lo quartièr de la Moneia. La situacion se tendèt amb de confrontacions amb las fòrças de l’òrdre e l’usatge de mortièrs artisanals, que causèron pas cap d’incendi, çò rapòrta Libération.

Las autoritats rapòrtan la detencion de 20 personas, dont 17 son en gàrdia a vista per violéncia contra las fòrças de l’òrdre. Parallèlament, nòu joves, compreses tres menors, son detenguts a Tolosa e Rumans jos l’acusacion d’”assassinat en banda organizada”, de “temptativas d’assassinat” o de “violéncias volontàrias comesas en reünion”.

Aquel episòdi fa partida d’una campanha de l’ultradrecha suls rets socials, a l’origina de tensions e de la difusion d’imatges de “cortègis espontanèus en omenatge a Thomas amb de drapèls franceses” a Valença. Simultanèament, a Lion, una manifestacion d’ultradrecha foguèt enebida e s’acabèt amb una arrestacion dijòus passat.

Aquelas accions illustran la polarizacion creissenta de la societat e las tensions generadas per l’incident inicial, que daissèt un jove mòrt e uèch personas nafradas, dont doas grèvas, en seguida d’una carpinhada[1] davant la sala de las fèstas de Crèpôl.

 

Lo precedent de Dublin

 

Los faches que los a viscuts lo Dalfinat se semblan fòrça a çò que se tenguèt la setmana passada a Dublin, ont 34 militants ultradrechistas foguèron arrestats après provocar de damatges grèus dins lo centre vila. Protestavan contra una temptativa d’agression amb cotèl contra una femna e son enfant que la capitèt a empachar un jove eròi. Aquel eròi es un migrant brasilièr, l’assalhidor a lo ciutadanatge irlandés e demòra al país dempuèi 20 ans. Mas los rets socials afortiguèron qu’èra un immigrat argerian.

 

 


[1] “rixe” segon las paraulas del procuraire.

 

 

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

AFA-OC Occitània
5.

Osca als tipes del barri qu'an estat reactius e quand fach plorar aqueles merdetas racistas. Los arabis eran en Occitània abans los franceses e son mai acceptables que los reacs de Paris! Oai e libertat !

  • 14
  • 24
Pascau
4.

Lo punt de vista deu media antifascista Contre Attaque sus aqueste eveniment que m'a semblat interessant tanben : que partatjan tròç de videos presas per joens d'aqueth quartièr qui an detengut un militant e qui li an pres lo son portable. Qu'i aprenem que l'operacion èra coordonada suu hialat sociau Telegram e qu'avèn consignas de "pas trucar los "b****oules". Que i a informacions au condicionau dens aqueth article, donc dificile de saber çò qui s'ei passat exactament mes çò de segur qu'ei qu'èra ua manifestacion racista. https://contre-attaque.net/2023/11/26/romans-sur-isere-operation-gros-lardon/

  • 21
  • 21

Escriu un comentari sus aqueste article