Dissabte diabolic pels Dragons

Los Dragons jogavan dissabte de vèspre la primièra partida del rendètz-vos de Newcastle fàcia a Leigh. Faguèron jòc egal amb lors adversaris mas capitèron pas, malgrat una dominacion dins las darrièras minutas, de ganhar: corta e pivelaira desfaita 24-26. En seguida, Hull KR atomizava Salford 54-0 e Leeds s’impausava fàcia a St Helens: 17-4.

Dimenge, Huddersfield batiá Hull FC: 12-10; Wigan èra mai fòrt que Warrington: 22-20; Wakefield dominava Castleford: 32-8.

Aprèp 10 partidas, Hull KR es al cap del classament amb 18 punts, davant Wigan: 16 punts e Leigh 15. Los Dragons (7ns) se trapan dins un grop a 10 punts amb St Helens, Wakefield e Warrington. Se trigòçan en coa Castleford (4 pts), Huddersfield e Salford (2 pts).

Pels Dragons, plaça a la mièja finala de la Cup aqueste dissabte 10 amb lo rescontre fàcia a Hull KR que se jogarà a York. La segonda mièja finala entre Warrington e Leigh se jogarà dimenge a St Helens.

NRL: las Pantèras se reviscòlan

Dijòus a Brisbane, se joguèt la primièra de las 3 partidas femeninas entre las seleccions de Nòva Galas del Sud e de Queensland. Las Blavas de Nòva Galas s’impausèron 32-12.

Divendres, se tenguèron 2 partidas del Magic Round: las Làmias s’impausèron fàcia a las Anguialas 28-18 e victòria dels Polets fàcia als Dalfins: 36-26.

Tres autras partidas se debanèron dissabte: se Newcastle batèt aisidament los Lapinons 30-4, las autras doas confrontacions foguèron mai sarradas e vegèron las victòrias dels neozelandeses fàcia als Vaquièrs 30-26 e dels Tigres fàcia als Dragons: 34-28.

Las Pantèras son totjorn en darrièra plaça al classament, mas lor victòria fàcia als Cavals Fòls 32-8 mòstra que caldrà comptar suls campions se demòran sus aquesta dinamica. Los Dògols confirman lor plaça de primadièr en batent los Titans 38-18 e Canberra s’impausa fàcia a Melbourne (que menèt 14-0 en debuta de partida) al punt en aur 20-18.

Un TO dominaire

En Championship, Tolosa recebiá los primièrs de la competicion: Halifax. Pas impressionats, los occitans menavan 20-0 a la pausa e s’impausèron 32-0.

Aqueste dissabte 10, los Blau e Blanc jogaràn a Oldham.

Super-XIII: la suspresa Vilanòva

Dimècres, se jogavan las darrièras doas partidas de la fasa de classament. Las formacions se presentèron plan remanejadas: aquò permetèt a Limós de batre St Gaudenç 42-26 e a Albi de confirmar sa primièra plaça en ganhant fàcia a Carcassona: 58-16.

Dissabte, pel compte dels barratges, St Estève recebiá Vilanòva. Los catalans menèron 12-0: Vilanòva tornava faire son retard, puèi prenguèt l’avantatge per véncer 32-12. Los Leopards marcan atal un retorn al primièr plan aprèp d’annadas de vaca magra.

Dimenge, a Pià, la resulta foguèt tanben pas confòrma al classament, vist que Limós s’impausèt 24-22.

En mièja finala, dissabte, Albi reçauprà Limós e, dimenge de vèspre, Carcassona aculhirà Vilanòva a Domèc.

En Elèit 2, dissabte, n’èrem tanben a l’ora de las mièjas finalas: dissabte, Vilagalhenc-Argon mestrejava la partida fàcia a Illa per emportar la victòria 33-16 alara que, dimenge, Palau, aprèp un primièr temps equilibrat (12-12) dominava Carpentràs 34-16. A aquèl nivèl, la logica es respectada, vist que son los primièrs dos de la fasa de classament que se tornaràn trapar en finala.

A Vilanòva de Menerbés, se jogavan las finalas de las Copas femeninas. En Nacionala, Vaux-en-Velin bat lo XIII gascon. En Elèit, novèl trofèu per las Divessas Catalanas que baton Bèglas 44-0.