Montpelhièr vibrèt lo 15 d’abril passat amb una serada literària inoblidabla organizada pels estudiants d’occitan de l’Universitat Pau Valèri. Dos noms plan coneguts de la scèna occitana, Aura Seguièr e Florant Mercadièr, faguèron viatjar estudiants e professors entre monds preïstorics, novèlas roergassas e istòrias musicadas. Lo rescontre combinèt de presentacions, d’escambis e una performança que daissèt totòm bocabadat.

Aura Seguièr e Florant Mercadièr èran las vedetas de la serada del 15 d’abril passat. Los estudiants de l’Universitat Pau Valèri organizèron lo rescontre del libre al sit Sant Carles a Montpelhièr. Lo rescontre èra ibrid: en presencial amb Florant Mercadièr e en linha amb Aura Seguièr e cèrt·a·s estudiant·a·s.

Aquí los estudiants d’L1 presentèron Aura Seguièr, audenca, qu’escriguèt Rodèo preïstoric, una istòria destinada als adolescents, de plan bon legir, que pivelèt totes los estudiants. Nos conta l’istòria de Matèu e Estela, dos liceans a la caça al triceratòps que trèva Sotinhac. Lo resson principal: per los qu’avián pas la costuma de legir un libre tot en òc, èra una lectura plan aisida. La presentacion èra seguida d’un escambi amb l’escrivana sus sos libres e notablament sus Pepper & Carrot. Un webcomic libre de dreches que lo revirèt en lengadocian mentre que l’escrivan Sèrgi Javaloyès o faguèt en gascon. Amb una primièra exclusivitat, la lectura de la debuta del primièr capítol de la seguida de Rodèo preïstoric.

Après l’aver grandmercejada, los L2 presentèron Florant Mercadièr, «roergàs de 40 ans AOC» (cf la novèla Cap o Pas). La rejoncha de novèlas Quatre vidas, una mòrt agradèt fòrça als estudiants tanben. Coma sèm dins de racontes vertadièrs que trèvan lo Roergue de Bodon, Martí, Cortial e de segur Mercadièr, mistèri, secrets e confidéncias son al rendètz vos. Una lista de musica nos i es prepausada per l’autor, per acompanhar nòstra lectura. Per acabar la serada, just abans la partida dedicaças, aguèrem l’astre d’ausir una istòria exclusiva ritmada per de musica jogada al topin de man (handpan), que metèt tot lo mond bocabadat!

Mercejam fòrça lo departament d’occitan de l’Universitat Pau Valèri, los professors qu’organizèron lo rescontre, los L1 e L2 que dirigèron aquesta entrevista, e subretot disèm grandmercé a aquestes dos autors que faguèron pantaissar la sala tota!

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jornalet.com.