Lo 22 d'abril, se presentèt las 30as Jornadas Occitanas de l'Universitat Autonòma de Barcelona (UAB), organizadas per l'Archiu Occitan (AO), centre restacat a l'Institut d'Estudis Medievals de l'universitat. Aquel eveniment, exemple unic de la difusion e de la promocion de la cultura occitana dins lo quadre universitari catalan, prepausa cada annada un programa variat que compren de conferéncias, de presentacions e divèrsas activitats culturalas.

La presentacion se tenguèt dins la sala de revistas de l'UAB, e foguèt animada pel director de l'AO, Antoni Rossell. Èra acompanhat d'Adriana Camprubí e Jordi Ràfols, novèls membres de la còla de l'AO, que s’encargaràn respectivament dels domenis dels occitan medieval e modèrne.

Ongan, las Jornadas Occitanas s'espandiràn sus mantun mes e comprendràn una quinzena de conferéncias e de presentacions que se tendràn a l'encòp a l'UAB e dins d'autres endreches emblematics de Barcelona, tals coma La Boqueria, l'Acadèmia de las Bonas Letras o l'Espaci Vilaweb. Las activitats debutèron lo 24 d'abril passat a l'espaci La Boqueria de Barcelona, amb una taula redonda entitolada "Trobairises dins la literatura contemporanèa" e la presentacion del disc Ar de Provença e del libre Lírica trovadoresca medieval.

Demest las divèrsas activitats, se destria la projeccion del filme Bogre, ont son realizaire Fredo Valla partejarà amb los participants son òbra e sas experiéncias. En mai d’aquò, l'etnomusicològ e cantador occitan Pascau Caumont presentarà son libre-disc Joan-Loïs Lavit, ua votz ena montanha de Bigòrra. I aurà tanben de contes e legendas tradicionals gascons contats per David Bordes, contaire bearnés.

Dins l'encastre de las Jornadas, se van commemorar los 50 ans de la publicacion de l'òbra Los Trovadores de Martí de Riquer. A aquel eveniment, que se debanarà lo 6 de junh a l'Acadèmia de las Bonas Letras de Barcelona, serà presenta, demest d’autres, la filha de l'autor, la filològa Isabel de Riquer.

Dins lo meteis domeni de la lirica trobadoresca, i aurà un espaci especial consagrat a la lirica galega medievala amb una conferéncia sul Pergamin Vindel, manuscrit contenent sèt Cantigas de amigo de Martín Códax, un dels mai grands trobadors de Galícia.

Enfin, metèm endavant la taula redonda sus la premsa numerica en occitan e en catalan, qu'aurà luòc lo 4 de junh a l'Espaci Vilaweb e qu’i participarà Jornalet. Aquel eveniment serà una escasença de debatre suls desfises e sus las escasenças dins la comunicacion en occitan a l'èra numerica.

D'autre caire, l'Archiu Occitan a anonciat qu'un cors de lenga occitana seriá tornarmai dispensat a l'UAB, après mantuna annada d'abséncia. Lo cors novèl, que s'adreiça a totas las personas interessadas per la descobèrta de l'occitan, aurà una durada de 10 oras e serà dispensat del 6 de mai al 3 de junh.