Lo sit web Textòc, qu’amassa de tèxtes en occitan per que sián emplegats dins l’ensenhament o pel plaser de la lectura, es tornarmai disponible en linha gràcias al trabalh de la seccion varesa de l’Institut d’Estudis Occitans (IEO 83). Lo sit se tròba a l’adreiça seguenta: http://ieo83.byethost12.com/textoc.html.

Lo projècte prepausa una colleccion de tèxtes variats en occitan en mai d'una varianta, pensats per èsser d’utilitat dins los corses de lenga o coma ressorsas de lectura. L’IEO 83 a anonciat que lo sit es encara en mantenença: qualques ligams pòdon èsser romputs e d’imatges pòdon mancar. Per tant, serián reconeissents a totas las personas que li senhalarián de problèmas tecnics de corregir. A mai, d’autras ressorsas son previstas del temps que lo sit se mòstra dobèrt a tota contribucion exteriora e prepausa d’apondre d’autres tèxtes a la colleccion.

Un sit coma Textòc pòt èsser un complement preciós a d’autras ressorsas en linha en occitan, coma lo quite Jornalet, ont los articles, las illustracions e los àudios pòdon tanben servir de supòrt pedagogic o de matèria per far trabalhar l’aprendissatge de l’occitan.