Lo 1r de mai de 2025, dens lo quartièr deu Hedars de Pau, un militant occitanista de setanta ans que sigó violentament agressat per dus gojats qui li raubèn dus drapèus, l’un comunista e l’aute antifascista, après las manifestacions de celebracion de la Hèsta deu Tribalh. La victima qu’estó getada au sòu e miada d’urgéncia a l’espitau entà examens medicaus; la gravetat de l’agression qu’a motivat lo depaus d’ua denóncia.

L’ataca que’s tienó a la fin deu repaish tradicionau qui la Tor deu Borrèu, locau politic occitanista, organiza despuish 33 ans. La jornada que s’èra debanada dens un ambient hestiu dab grasilhadas e concèrt, e qu’avèva amassat nombrós militants .

Las fòrças de la polícia qu’intervienón lèu entà efectuar los prumèrs contraròtles. Lo grop qu’a totun exprimit la soa perplexitat en entenent mantun còp l’expression «l’arròda que torna» de las parts deus policièrs, qui interprèta coma inquietanta, tant mei qu’a pas enqüèra recebut d’informacions sus las precedentas atacas dont estó victima que hè près d’un an, quan los locaus estón recobèrts de pegasolets fascistas dab miaças de mort. Que planhen egaument que la declaracion d’un testimòni, qui s’ei manifestat espontanèament dab la denóncia, non sia aparentament pas estada reculhida .

Dens un comunicat, la còla de La Tor deu Borrèu que condemna fermament aquera agression e qu’assegura que la soa determinacion independentista occitana e antifascista “n’ei pas estrementida, a despieit deus hèits citats anteriorament, mes ahortida”.