Bandièra01 1180x150: País Invisible

Actualitats

crotz-tolosaCreated with Sketch.LengadòcAlbigésCastrés

Greta Thunberg es venguda en Albigés per manifestar contra l’A69

La militanta ecologista suedesa a exprimida son oposicion al projècte d’autoestrada, afirmant que destruiriá la natura e entraïnariá una esplecha toxica

Greta Thunberg es venguda en Albigés per manifestar contra l’A69
Greta Thunberg es venguda en Albigés per manifestar contra l’A69

Tèxte legit

Greta Thunberg venguèt en Occitània ièr dissabte per sosténer la mobilizacion contra l’autoestrada A69 entre Castras e Tolosa. La militanta ecologista suedesa i exprimiguèt son oposicion al projècte, afirmant que destruiriá la natura e entraïnariá una esplecha toxica, çò rapòrta Libération. Acompanhada d’una delegacion internacionala d’activistas, Thunberg participèt a una jornada d’obradors e de concèrts pendent una cabanada.

Divendres, lo prefècte del departament de Tarn aviá enebida la manifestacion en evocant de “risques de trebolaments màgers de l’òrdre public”. E ièr dissabte, près de la ZAD (zòna a defendre), esclatèron los afrontaments entre gendarmas e zadistas. E mai la manifestacion se volguèsse festiva, las fòrças de l’òrdre se presentèron en fasent un emplec massís de gas lacrimogèn per dispersar los activistas. Pasmens, aquestes poguèron penetrar dins lo terren privat de la ZAD.

Lo movement de protèsta contra lo projècte semblava de se desalenar, mas la preséncia de Greta Thunberg a reviudada l’atencion internacionala. La societat concessionària de l’autoestrada afirma que lo 45 % del budget de l’obrador es estat engatjat, e que lo 95 % del desboscament es estat realizat. Lo govèrn francés es determinat a menar lo projècte a bon tèrme malgrat l’oposicion locala.

Lo projècte d’autoestrada A69 cèrca de reduire de 20 minutas lo viatge en veitura entre Tolosa e Castras. Los opausants creson qu’es totalament contradictòri amb l’urgéncia climatica, que farà desaparéisser de tèrras agricòlas e qu’aumentarà lo risc de concentrar mai de populacion dins la metropòli tolosana. Coma alternativa prepausan d’afortir la ligason ferroviària entre las doas vilas.

Greta Thunberg prevei de donar supòrt a d’autras manifestacions ecologistas, dont la que s’opausa a l’extension d’un tenement petrolièr al Bacin d’Arcaishon (Bug). De remarcar que la societat explechaira expliquèt en novembre passat a Libération que los revenguts d’aquel tenement permetrián de finançar la transicion ecologica.

 

 

 

 

 

 

 

 

 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article