Bandièra01 1180x150: Comuna de Tolosa

Actualitats

EconomiaInternacionalPoliticaSocietat

Tensions al Salon de l’Agricultura de París: Macron l’inaugura amb protèstas e retard

Macron a anonciat voler de “prèses postam” per respondre a la colèra dels pageses e un “plan d’urgéncia clavariá” per ajudar los tenements en dificultat

Tensions al Salon de l’Agricultura de París: Macron l’inaugura amb protèstas e retard
Tensions al Salon de l’Agricultura de París: Macron l’inaugura amb protèstas e retard | Euronews

Tèxte legit

Lo Salon de l’Agricultura 2024 de París comencèt dissabte amb un retard de cinc oras a causa d’incidents a l’intrada qu’implicavan de païsans en protèsta contra la preséncia d’Emmanuel Macron. Lo president francés inaugurèt l’eveniment jos las escridassadas e se cancellèt lo grand debat previst amb lo mond agricòla. Macron anoncièt voler de “prèses postam” per respondre a la colèra dels pageses e un “plan d’urgéncia clavariá” per ajudar los tenements en dificultat.

Malgrat las protèstas, Macron incitèt los païsans a apasimar la situacion, en evocant la necessitat de “salvar lo Salon”. La França Insomesa (LFI) saludèt las anóncias de Macron suls prèses postam, o considerant coma una victòria de las luchas anterioras. Pasmens, la Confederacion Paisana demanda de mesuras mai substancialas, sustot l’arrèst dels acòrdis de liure escambi, e un sosten a la transicion agroecologica.

La jornada foguèt marcada per un desplegament massís de fòrças de l’òrdre e d’escambis agitats. La Coordinacion Rurala e l’FNSEA avián orquestradas d’accions abans l’obertura, soslinhant un prigond malaise dins lo sector agricòla francés.

Contra la Lei Egalim se protestèt tanben dissabte al Salon de l’Agricultura, essent que segon los manifestants sembla pas de produire los efièches escomptats suls prèses. Los escambis tibats rebaton un malaise prigond dins lo sector agricòla francés. Los episòdis precedents, dels Gilets Jaunes a la contèsta de las retiradas, an marcada la relacion de Macron amb lo salon, fasent d’aquela edicion un capítol suplementari dins l’istòria agitada del president al Salon de l’Agricultura.

 

Los ecologistas son pas benvolguts segon l’FNSEA

 

La controvèrsia aviá començat amb la proposicion de Macron d’organizar un debat bèl al Salon per apasimar las tensions. Una idèa que suscitèt la colèra de l’FNSEA per la convidacion del movement ecologista Soslevaments de la Tèrra.

De lor costat, los Soslevaments de la Tèrra èran pas brica estrambordats per aquel debat que considèran coma una “mascarada”. Lo collectiu estima qu’es interessant “de notar que lo govèrn [francés] es totjorn prèst per cedir a las exigéncias del patron de l’FNSEA”.

De soslinhar que l’FNSEA es acusat per divèrsas organizacions païsanas de promòure un modèl agricòla estacat mai que mai a produire en granda quantitat, en detriment de la biodiversitat e del benèsser dels animals en noirigatge. Son patron, recentament elegit, Arnaud Rousseau, es una figura influenta del mond agricòla francés. Ancian militar reservista e diplomat en afars, esplecha 700 ectaras amb sa femna, dirigís un grand grop industrial agroalimentari, e defend las megarestancas e los OGM novèls. Es tanben un passionat de la corrida.

De remarcar, fin finala, que lo soslevament païsan a revelat un certan daissar-far policièr inabitual en França.

 

 

 

 

 

Etiquetas

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Felip
2.

Mès sustot l'Artanhan estoc un reprimaire de prumèra. Que massacrèc paisans revoltats dens la region d'Aubenas en 1670 (veser revòlta de Roure)...

  • 3
  • 0
Lachaud
1.

Quand l'òm parla daus paisans (uei, daus agricultors), l'òm n'en parla comme d'una profession coma una autra.
Pertant, una bona santat passa per una bona alimentacion. Que ton aliment siaja ton premier medicament disia lo pair fondator de la medecina oficiala d'uei (haneman, ieu creise).
Los governaments consideran l'agricultura coma un comerci, un biais de far rentrar de l'argent dins las caissas de l'estat per balhar lo bon balanç entre l'exportacion e l'importacion.

De las multinacionalas coma Intermarchat produsan mesme leurs legumes e fan viure 10 000 salariats per aquò. Quò es benleu çò que Macron apela la fonccionarisacion daus paisans.
Tots salariats. Los salariats s'occupan de lòrs salairis e pas d'autres causas. L'estat commande; lo salariat obeit bestamient.
La paisanaria occitana a estada marcada per daus noms coma Jacquo lo croquant, Marcelin Albert, d'Artanhan. Los dos prumiers representan la condicion paisana e obriera. D'Artanhan es lo qu'a emigrat vers Paris per devenir capitaina de la Garde dau rei e a capitat a aver una bona plaça. Uei, a Paris i a belcòps d'emigrats occitans coma d'emigrats africans.
Benleu que quò es tot aquel sistem que fau cambiar.

  • 5
  • 0

Escriu un comentari sus aqueste article