Es en 2012 que comencèt l’aventura de TèVé Òc, una associacion de produccion audiovisuala, fondada a Nimes en 2012.

Cada setmana, prepausava son emission «Lenga d’Òc», un magazine de 13 min rodat en País d’Òc. Actualitat occitana, retrachs de gents d’aicí, reportatges sus la cultura, lo patrimòni e l’economia, lo tot en lenga nòstra. E, dempuei 2012, TèVéÒc siam arribats a 372 reportatges realizats en Occitània Granda.

S’a la debuta eriam un desenau, ara lei membres actius an ben demesit e se còmptan sus la mitat dei dets d’una man!

Pasmens, la vòlha de promòure l’occitan demòra e leis accions nombrosas dins mon departament d’Aude fan flòri e es dificil de respòndre pas au besonh de se’n faire lo ressòn.

Mai es pas una òbra aisida de filmar e de montar un vidèo que tèngue la rota. Fau saupre que fau una ora de trabalh de montatge per una minuta a l’ecran. Mai… rai, es un plaser de portar a la coneissença deis abonats e dau public la pròva que l’occitan viu encara e totjorn.

Leis abonats? De que servís de s’abonar? çò demandèt una amiga. E ben, tot simplament, se vos abonatz reçaupretz un e-mail que vos anonciarà la sortida d’una emission novèla e ansin mancaretz ren dei noveutats.

A la fin dau mes d’abrieu, reçaupère l’anóncia de l’abonament darrier: lo 1000n! Pòu semblar pauc en comparason d’autrei, mai per una emission en lenga regionala realizada benevòlament, es pas tan marrit, non?

Podètz veire nòstreis emissions sus nòstre site www.teveoc.com via nòstra cadena Youtube; mai tanben lo site Occitanica restacat au CIRDÒC, puei dins la seccion de vidèos de Jornalet.

Pensatz doncas de vos abonar a nòstra cadena Youtube Tè Vé Òc!