Après 53 ans passats en orbita, lo modul de devalada de la sonda sovietica Kòsmos 482 es a mand de tornar imminentament sus Tèrra, dins una casuda incontrarotlada, çò rapòrta Fanpage. La fenèstra de rintrada se ressarra progressivament. Segon los darrièrs calculs obtenguts per l'estacion de susvelhança satellitala SatTrackCam Leiden, situada a Leiden (Païses Basses), l’impacte es previst a l'entorn de 7h26 UTC, siá 9h26 en Occitània, lo dissabte 10 de mai. Pasmens, demòra de encara marges d'incertitud, e l'impacte poiriá subrevenir entre lo 9 e l'11 de mai.

Lo risc geografic es estendut, cobrissent una larga zòna entre los 52°N e los 52°S de latitud, donc Occitània i es compresa. Pasmens, los expèrts considèran que lo risc de damatges grèus es feble, perque una partida bèla de la zòna concernida es oceanica. L'impacte sus una zòna abitada, totun possibla, demòra pauc probabla.

Aquel retorn sus Tèrra es particularament preocupant a causa de la natura del brigalh espacial implicat. Los scientifics pensan que s'agís probablament del modul de davalada de la mission Kòsmos 482, que deviá aterrar sus Vènus en abril de 1972. A causa d'un disfoncionament del lançador, la sonda a pas jamai atench sa destinacion e demorèt en orbita terrèstra. Al contrari d'autres brigalhs, aquel modul es esquipat d'un potent bloquièr termic concebut per resistir a las condicions extrèmas de l'atmosfèra venusiana, çò qu'aumenta las possibilitats que subrevisca a la rintrada dins l'atmosfèra terrèstra.

Lo fragment mesura mai o mens 1 mètre de diamètre e pesa près de 480 kg. Sa velocitat d'impacte poiriá aténher 242 km/h, çò qu'en fa un objècte particularament perilhós. Las oras venentas permetràn de melhor precisar l'ora e lo luòc exactes de l'escrachament.