La primièra mièja-finala del Super-XIII se tenguètdissabte  passat 10 de mai en tèrra tarnesa. Albi recebiá Limós. Logicament, los locals s’impausèron 26-8.

Dimenge, a Domèc, Carcassona recebiá Vilanòva que tornava a aquel nivèl aprèp una abséncia de onze annadas. Los aquitans vendèron carament lor pèl de Leopards, mas s’inclinèron fin finala 6-11.

Doncas, a Narbona, dimenge 25 de mai, la finala opausarà, coma en 2024, Carcassona e Albi.

En dobertura, se tendrà una susprenenta finala dels U19, vist que las formacions classadas 1a e 2a son eliminadas: los catalans per Avinhon (22-38) e Albi per Lesinhan (34-38).

Dissabte, a Lesinhan, l’AS Carcassona empòrta la Copa de França dels U17 en batent Selon: 34-28. En U15, larga victòria del XIII Catalan fàcia a Vilanòva: 27-6.

Dimenge, a Vilanòva-Menerbés, Vilafranca d’Albi (campion de Nacionala 2 l’an passat) empòrta lo bloquièr de Nacionala-1 fàcia a Toluges-Baó: 33-10.

La finala d’Elèit 2 entre Palau e Vilagalhenc-Argon se debanarà aqueste dissabte 17 de vèspre (15h30) sus la magrinèla pelena de Pià.

Cup: finala Hull KR-Warrington

Los Dragons jogavan aqueste dissabte de vèspre a York la mièja-finala de la Cup fàcia a Hull KR. Tenguèron còp 40 minutas (12-16 a la pausa), mas perdèron 12-36. Dimenge, a Saint Helens, Warrinton bat Leigh: 21-14. Finala doncas Hull KR-Warrington lo 7 de junh a Wembley.

Cò de las femeninas, la finala opausarà St Helens e Wigan.

Aqueste dijòus 15 de mai, los Dragons aniràn afrontar St Helens abans de reçaupre Wigan (lo 24 de mai) e Hull FC (31 de mai).

Championship: e de quatre en seguida pel TO!

Oldham a vist Elòi Pelissièr jónher lo club aprèp la fin de sason de Pià. E justament, Oldham recebiá l’ancian club del catalan: Tolosa.

La formacion occitana s’impausèt en signant una quatrena victòria en seguida: 30-18. Partida venenta: recepcion de Barrow lo 24 de mai.

NRL: las remontadas son de mòda

Una partida entre mal classats dobrissiá dijòus la 10a jornada del campionat NRL. Los Dalfins ganhèron cò de las Anguialas: 20-16.

Divendres, Newcastle menèt 20-0 a la mièja ora de jòc, mas son los Titans que ganhèron 24-20 amb lo darrièr ensag a 2 minutas del tèrme! Los Cavals Fòls menèron longament, mas los Lapinons tornèron a nautor abans que Mitchell passèsse un tombat lonhdan de 50 mètres, puèi, sus la còrna, fintava de se colcar abans d’alongar lo braç per un darrièr ensag e una victòria: 22-14.

Dissabte, los Dògols confirmèron lor primièra plaça en anent batre Canberra: menats 0-20 a la pausa, ganhan 32-20!

Dos còps, los Vaquièrs remontèron 12 punts sus las Pantèras sus una partida sens venceire: egalitat 30-30.

Cò dels Dragons, los neozelandeses menavan 14-0 a la pausa e ganhèron mercé a un tombat en fin de partida 15-14.

Dimenge, a Melbourne, la Tempèsta atomizèt los Tigres: 64-0.

A Cronulla, Manly mena 14-0 a la pausa, las Làmias tornan a nautor mas las Aglas de Mar s’impausan: 30-14.

Dijòus, se debanarà a Sydney la segonda partida femenina dels Estats d’Origina.

Chifras:

• 150 000: lo nombre d’espectators per las 3 jornadas del Magic Round a Brisbane: 3 còps l’estadi plen.

• 18n: l’ARL a oficializat la preséncia en 2027 del club dels Orses de Perth dins lo campionat NRL. En 2018, i participarà tanben una 19a formacion: la de Papoa.