Lo musician catalan Pol Orobitg presenta uèi en premícias son nòu single inspirat de l’imne occitan amb una proposicion sonòra del sègle XXI. Pasmens, l’artista i manten la carga istorica, emocionala e identitària, e interprèta las paraulas aranesas e lo refranh lengadocian.

Un an après la publicacion de son primièr album Tot o zero, Orobitg contunha son camin amb un títol que vòl far lo pont entre la memòria collectiva e l’avantgàrdia musicala. Las originas de la cançon se pèrdon dins la nuèch dels tempses, mas ela es venguda un simbòl de resisténcia e d’identitat pel pòble occitan. Uèi, dins sas divèrsas variantas, es l’imne oficial de la Val d’Aran o encara del club de fotbòl FC Tolosa.

Dins aquela nòva version, Orobitg manten sa complicitat artistica amb lo productor brasilièr Julio Bernardo, amb qui bastís una pèça que mescla lo respècte per las raices amb una estetica sonòra contemporanèa. L’autotune, l’electronica subtila e l’armonia modèrna dialògan amb la tradicion, dins un exercici musical que restaca passat e present.

Lo lançament arriba acompanhat d’un videoclip realizat per Jason Palma e Joan Molas, que revira en imatges la proposicion sonòra, amb una carga de nostalgia, d’epica e de simbologia visuala.