Bandièra01 1180x150: Comuna de Tolosa

Actualitats

Ucraïna acusa Russia d’ocupar militarament los aeropòrts de Crimèa

Pasmens, las autoritats ucraïnesas asseguran d'aver représ lo contraròtle dels aeropòrts. Las autoritats russas negan qu’ajan quicòm a veire amb l’intrada d’òmes armats dins las installacions

Aumenta de mai en mai la tension dins la peninsula de Crimèa, aquela republica autonòma d’Ucraïna amb una majoritat de populacion russa. Ièr lo ministre de l’interior del nòu govèrn interimari ucraïnés, Arsen Avakov, acusèt lo govèrn rus d’ocupar l’aeropòrt de Sebastòple, e aquò o qualifiquèt d’“invasion militara e d’ocupacion”. De mai, qualques oras abans, de desenats d’òmes armats intrèron dins l’aeropòrt internacional de la capitala de Crimèa, Sinferòpol. Pasmens, las autoritats ucraïnesas asseguran d'aver représ lo contraròtle dels aeropòrts. Las autoritats russas an negat tota implicacion dins l’ocupacion dels aeropòrts del territòri, e mai s’an reconegut qu’an aumentat la preséncia militara dins la zòna.
 
Dimècres, lo parlament de la Republica Autonòma de Crimèa, al sud d’Ucraïna, aviá anonciat que convocariá un referendum sus “lo melhorament de l’estatut d’autonomia e l’alargament dels poders”. A prepaus de la crisi politica, lo president de la cambra diguèt que “la sola sortida possibla es d’aplicar los principis del govèrn dirècte del pòble. Dins aquel sens cresèm que solament amb un referendum los ciutadans de Crimèa seràn capables de determinar lo futur de l’autonomia, per eles meteisses e sens cap de pression exteriora.”
 
Dijòus de matin, un grop d’òmes intrèron armats dins lo sèti del govèrn e del parlament de la Republica Autonòma de Crimèa, segon çò que raportèt la television locala ICTV. I issèron una bandièra russa e arborèron l’eslogan “Crimèa es Russia”. Los assalhidors portavan de ribans de color negra e irange, un simbòl rus de la victòria pendent la Segonda Guèrra Mondiala.
 
Segon qualques informacions, las bastissas publicas de Crimèa serián ocupadas per un grop nomenat Autodefensa de la Populacion Russofòna de Crimèa, un movement format per d’èx-militars e d’èx-agents de l’intelligéncia.
 
La capitala de Crimèa, Sinferòpol, protagonizèt abans ièr d’afrontaments fòrça violents entre los manifestants pròrusses e los manifestants partisans dels nòus dirigents ucraïneses qu’an pres lo poder.
 
Tot aquò se passèt qualques oras après que lo president de Russia, Vladimir Putin, ordenèsse a l’armada de metre las tropas en alèrta a l’oèst e al centre de Russia, segon çò qu’aviá raportat lo ministre de la defensa Sergei Shoigu.
 
Los Estats Units e l’Union Europèa an avertit Russia contra quina intervencion militara que siá en Ucraïna, una anciana republica sovietica que Putin considèra una “nacion sòr” e qu’el la voldriá integrar a l’Union Eurasiatica qu’es a bastir.
 
Las autoritats russas manifèstan que Moscòu interferirà pas dins los afars d’Ucraïna, segon çò que declarèt Valentina Matviienko, la pòrtavotz del Senat rus, a l’agéncia Interfax. Matviienko apondèt que Russia fariá pas usatge de la fòrça.
 
Pasmens, las declaracions del primièr ministre rus Dmitrii Medvedev, a prepaus dels interèsses de Russia e de sos ciutadans en Ucraïna, fan pensar als arguments emplegats pendent l’invasion de Georgia en 2008, quand el èra president. 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Claudi Balaguer (Capsot) Millars (Catalonha del Nòrd)
13.

#12 Foguèsse envasida Ucraïna, podriá comptar sus una part importanta de sa populacion e mai dins las zònas russofònas que semblan de se manifestar majoritàriament per ara en favor d'Ucraïna. Puèi aparentament i a de movements dels poloneses cap a la frontièra... se l'informacion es corrècta, segur... Se parla tanben d'almens un vaissèl american que fariá camin cap a la Mar Negra mas qual sap?
Veirem, deman las causas seràn (un pauc) mai claras...

  • 2
  • 0
N. Eynaud Lo Martegue
12.

Per una comparason entre lei doas armadas :
- Russia : budget militar 90,7 miliards de dolars (2013), fòrça terrèstra 360 000 òmes, 2500 carris actius, mai de 6500 veïculs blindats actius, 5600 sistèmas d'artilhariá, 1500 sistèmas antiaerians, fòrça aeriana 160 000 òmes, 804 avions de combat (au mens 605 actius).
- Ucraïna : budget militar 1,2 miliards de dolars (2012), fòrça terrèstra 73 000 òmes, 1200 carris actius, mai de 5000 veïculs militars actius, mai de 2200 sistèmas d'artilhariá, 300 (?) sistèmas antiaerians, fòrça aeriana 460 000 òmes, 213 avions de combat.

La mitat deis unitats d'Ucraïna son situadas dins de regions russofònas. L'entraïnament e lo comandament son inferiors ai fòrças russas. En fòra deis armaments ja actius, lei dos país an de resèrvas gigantas (mai de 4000 carris en Ucraïna ; au mens 12000 en Russia, degun es capable de trobar lo nombre precís...) d'equipaments ancians datant de la Guèrra Freja.

  • 0
  • 0
N. Eynaud Lo Martegue
11.

#10 Trobar d'oficièrs superiors fisables va belèu èstre un problema per Ucraïna car la màger part son intrats dins l'armada dins leis annadas 1980 e foguèron formats au sen de l'armada sovietica. A donc probablement de liames importants ambé leis oficièrs rus (escòla comuna, guèrra comuna en Afganistan... etc). Aquò risca d'èstre utilizat per Russia per entraïnar mai de defeccions ò limitar la combativitat deis unitats blocadas en Crimèa.

Regardant leis armaments comprats dins divèrsei país, èran subretot d'armaments leugiers e de reconoissança. Leis armaments pesucs son produchs localament car l'industria ucraïnesa a una experiéncia non negligibla dins la fabricacion de totei lei tipes d'armaments terrèstres (es una fònt d'exportacion majora per l'economia d'Ucraïna). I a d'usinas d'armament fòrça importantas a... Karkòv. De mai, Ucraïna es utilizada coma intermediari dempuei leis annadas 1990 per comprar legalament d'armaments per de país desirós de demorar discrèts (en causa d'un blocus ò car son situats dins de regions amb un contèxte ja complicat). Donc, es pas segur qu'aquelei armaments foguèsson destinats ai fòrças dau país.

D'autra part, l'OTAN e l'UE se son limitats a de condamnacions verbalas (Putin dèu èstre afondrat de la menaça d'expulsion Russia dau G8...). A mon vejaire, Crimèa es perduda per Kiev.

  • 0
  • 0
Claudi Balaguer (Capsot) Millars (Catalonha del Nòrd)
10.

Un darrièr problèma per Ucraïna, l'amiralh causit ièr, Denis Berezovsky, per dirigir las fòrças navalas a fach defeccion e s'es mes del costat Crimèa-Russia!!!

  • 0
  • 0
Claudi Balaguer (Capsot) Millars (Catalonha del Nòrd)
9.

Bon, ara i a de problèmas a Donetsk... que venon tot bèl just de se declarar mai o mens autonòms o independents del govèrn ucraïnian... aquesta nuèch serà cruciala....

  • 0
  • 0

Escriu un comentari sus aqueste article