Bandièra01 1180x150: Comuna de Tolosa

Actualitats

Lo Conselh d’Euròpa planifica per la setmana que ven una macrobatuda d’immigrants irregulars

L’operacion policièra, guidada per Itàlia, cèrca d’obténer d’informacions sus las màfias organizadas que menan los immigrants en Euròpa

| Gilles Klein
Lo Conselh d’Euròpa lançarà del 14 al 26 d’octòbre una batuda per capturar massissament d’immigrants en situacion irregulara, segon çò que publica Eldiario.es. La macroaccion policièra, nomenada Mos Maiorum, es estimulada per la presidéncia italiana e cèrca d’“amassar d’informacions considerablas amb la tòca de recercar e desmantelar de grops de crime organizat”, tanben apelats “màfias”. Dins aquel sens, lo Conselh d’Euròpa a publicat un document, amb data del 10 de julhet, que sollicita totes los païses de l’Union Europèa per participar a aquela macroperacion policièra. Lo rapòrt detalha pas cossí s’identificarà las personas de deténer, mas cal soslinhar que seleccionar de gents per lor aspècte racial es illegal.
 
La tòca de l’operacion Mos Maiorum consistís a “afeblir la capacitat dels grops de crime organizat que facilitan l’immigracion illegala” cap a l’Union Europèa. E alavetz, pendent 10 jorns, las polícias dels estats de l’UE que seguiscan las indicacions d’aquel tèxt faràn de contraròtles d’identificacion massisses; e s’interrogarà los detenguts amb la collaboracion de l’Agéncia Europèa de la Gestion de la Cooperacion dins las Frontièras Exterioras (Frontèx).
 
Lo document del Conselh d’Euròpa especifica ben qualas son las donadas que cal obténer en aqueles interrogatòris: nacionalitat, genre, edat, luòc e data del primièr jorn dins l’UE, mejans de transpòrt per arribar, itineraris percorreguts e destinacion finala. Mas los interèssa de saber, mai que mai, los mòdus operandi dels viatges irregulars en Euròpa, los documents falses emplegats, las demandas d’asil fachas, la nacionalitat e lo país de residéncia dels “facilitaires” del trafec irregular e l’argent que lor a calgut pagar a aquelas màfias per far lo viatge.
 
L’ÒNU e lo quite Comissionat dels Dreches Umans del Conselh d’Euròpa an exigit l’eradicacion d’aquelas practicas. Se sap pas cossí se menarà aqueles contraròtles nimai qual serà lo critèri per seleccionar las personas d’interrogar, mas las seleccion per perfil etnic e racial dins las identificacions policièras respècta pas mantes tractats internacionals.
 
Çò que sabèm, es que lo Grop de Frontièras del Conselh Europèu, format per l’Union Europèa, Soïssa, Islàndia, Liechtenstein e Norvègia, s’amassèt lo 18 de julhet passat per discutir sus aquela operacion policièra, segon çò que publiquèt lo Parlament d’Àustria sus son sit web.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Robèrt Laurac
1.

Mercés per aquelas informacions. Cal avertir totes los nòstres amics inmigrants

  • 3
  • 1

Escriu un comentari sus aqueste article