Bandièra01 1180x150: Comuna de Tolosa

Actualitats

Rugbi de XIII: signaturas per la sason novèla e dèrbi bèl per l’an novèl

| Rugby Football League
2018 comença e Dragons catalans e Tolosa Olimpic an, en principi, clavat lo recrutament per las sasons novèlas de Superliga e de Championship que reprendràn en febrièr.
 
Lo campionat d’Elèit 1 repren, aprèp la pausa nadalenca, amb una brava oposicion Carcassona-Limós aqueste dimenge 7 de genièr.
 
 
Un segond papó a Perpinhan; un american a Tolosa
 
Del costat dels Dragons Catalans, en decembre, anoncièron las signaturas de l’arrièr-capitani de Papoa David Meads e del talonaire de Wigan Mac Ilorum.
 
Lo capitani de la seleccion papoa a signat per 3 ans. Jòga a l’arrièr, mas pòt tanben evolucionar coma centre o alièr. La sason passada portava las colors dels Bròncos de Brisbane.
 
Los Dragons jogaràn una partida amicala cò d’Hull FC lo 21 de genièr per preparar la sason.
 
A Tolosa, arriba lo pilar dels Estats Units qu’a jogat en NRL (145 partidas) e en Superliga (22 partidas). S’agís d’Edward Pettybourne  qu’a pres part amb la seleccion americana a las Copas del Mond 2013 e 2017! Per las primièras partidas, lo Tolosa Olimpic se deurà passar de Sam Rapira, nafrat a l’entraïnament (6 setmanas de pausa per sonhar son punhet). Los occitans descobriràn pas ongan America: la Federacion anglesa a fixat lo rescontre Toronto-Tolosa coma partida de dobertura de la Dimenjada Magica al mes de mai a Newcastle!
 
Lo Tolosa Olimpic lançarà sa sason per una serada-cabaret lo divendres 26 de genièr a Sant Orenç.
 
 
Maxime Gressèque sul banc limosenc
 
Caliá trapar un novèl entraïnaire cò dels campions de Limós que l’Olivièr Janzac los daissa per integrar lo grop d’entraïnaires dels Dragons. Los dirigents venon de fisar aquesta responsabilitat a Maxime Gressèque qu’arrestèt sa carrièra de jogaire en junh passat. A pres coma adjunt Mickaël Murcia. Sa primièra partida sul banc serà pel dèrbi d’aqueste dimenge 7 a Carcassona. Fa sièis meses es jos las colors dels Canaris que joguèt sa darnièra partida de campionat! Aquò ajusta de piment a l’afrontament entre lo tenent de la Copa e los campions; la partida serà precedida d’una taulejada (per se marcar: 06 79 49 40 31). La partida se poirà seguir sul sit web-TV de la Federacion.
 
Autre refòrt per Limós, mas aqueste còp sus la pelena: lo centre o segonda-linha tongan Paulos Latu (1,90 m; 105 kg)!
 
Dimenge tanben, Albi reçauprà los Orses de Sent Gaudenç, oposicion entre Verds e Blancs al Molin: Lesinhan-Vilanòva. A St Estève, los Dragonets-U23 reçaupràn Tolosa alara qu’Avinhon voldrà demorar sens desfaita del costat de Palau.
 
Los 13 e 14 de genièr, plaça als 1/16ns de la Copa Lòrd Derby! 2018 comença amb plan de vam!
 
 
 
 
Alan Roch
 
 
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article