Limós mai determinat que Carcassona
 
En cap d’aficha de la 4a jornada, se trapava lo dèrbi entre Carcassona e Limós, al pè de Ciutat. Lo terren èra plan banhat e la palma pro lisaira. Los limosencs se mostrèron mai determinats que los locals e marquèron dos ensages. Carcassona poguèt pas replicar qu’al pè amb tres penalitats. Lo campion s’impausèt atal a l’exterior: 10-6.
 
Victòria mai aisidas pel FC-Lesinhan fàcia a Vilanòva 52-6 e per Avinhon a Palau que tenguèt pas que lo primièr temps: 10-4 a la pausa, 42-12 al final.
 
Dissabte, St Gaudenç aviá opausat una brava resisténcia a Albi en tèrra tarnesa per pèrdre fin finala 22-16, alara que l’oposicion entre resèrvas a St Estève virava a l’avantatge dels Dragonets fàcia als Bròncos de Tolosa: 28-14.
 
 
Un Wiganer a Perpinhan
 
Los Dragons catalans marcan l’espelida de l’an novèl amb la signatura del talonaire deWigan, Michael McIlorum, internacional irlandés e anglés. Amb Wigan, a ganhat 3 Superligas, 2 Cups e 2 World Club Challenges. Un jogaire de 29 ans qu’a plan l’experiéncia del naut nivèl, doncas!
 
 
Plaça a la Copa
 
Novetat ongan en Copa Lòrd Derby amb l’entrada en competicion de las formacions d’Elèit 1 tre los 1/16ns de finala que se debanaràn aquesta dimenjada dels 13 e 14 de genièr.
 
Al programa: un sol afrontament entre pensionaris de l’Elèit 1: Albi-Vilanòva; Carcassona anirà defendre son trofèu a Lion. Qualques dèrbis son al programa: Baó-Dragonets, Pomars-Ferrals, Carpentràs-Avinhon. Al rugbi, es mai dificil per una formacion d’un escalon inferior de ganhar. Mas, de còps, Dama Copa fa de las sieunas.
 
Un mot sus la Copa de fotbòl per sotalinhar e saludar la difusion sus un canal del Net d’Eurosport de la partida Roazhon-París en breton.
 
 
 
 
Alan Roch