Bandièra01 1180x150: Comuna de Tolosa

Actualitats

Rugbi de XIII: los Dragons, revirats coma de pescajons

Aquesta dimenjada, Championship e Superliga entamenavan la competicion de 2018. E se Tolosa ritz, es pas brica lo cas dels Dragons

Larga victòria de Tolosa (46-14) fàcia a Swinton
Larga victòria de Tolosa (46-14) fàcia a Swinton | to.com
La razzià dels Vikings
 
Aqueste dimenge, los Dragons jogavan a Widnes. Manquèron las entamenadas dels mièges tempses, foguèron mai penalizats que los adversaris. Se capitèron d’èsser a egalitat a la pausa (12-12), la marca finala es sens pietat: desfaita 40-12. Demòra de trabalh de faire per èsser confòrmes a las ambicions. E tre aqueste dissabte, es Saint Helens que se presenta sus la pelena de Brutus…
 
Una sola de las cinc autras partidas foguèt sarrada: a Warrington, lo campion de 2017 Leeds anèt ganhar 16-12. Dins los autres rescontres, l’escart foguèt bèl: victòrias d’Hull FC sus Huddersfield 38-12, de St Helens fàcia a Castleford 46-6 e, ganhants a l’exterior, Wigan a Salford (40-12) e Wakefield a Hull KR 28-6.
 
En Championship, a Blanhac, Tolosa agèt pas de dificultats per batre los Lions de Swinton 46-14. Dimenge, Tolosa anirà jogar a Featherstone.
 
 
Lesinhan e Limós a la direccion
 
En Elèit 1, aquesta dimenjada vegèt la segonda desfaita de fila d’Avinhon. Aqueste còp, al pè de Pirenèus: victòria dels Orses de St Gaudenç suls provençals: 16-10.
 
Los dos afrontaments entre occitans e catalans virèron a l’avantatge dels audencs: larga victòria de Limós fàcia a Palau 40-18 e lo FC Lesinhan capita de batre los Dragonets 28-24. Atal, los Verd e Blanc prenon la primièra plaça del classament a egalitat de punts amb los limosencs.
 
Desillusion bèla per l’AS Carcassona, a l’infirmariá plan garnida: a Domèc, los albigeses marcan en contra dos ensages de 80 mètres e los locals tornaràn pas. Victòria dels Tigres sens apèl: 34-10. Vilanòva bat los Bròncos de Tolosa: 28-23.
 
Albi-Lesinhan serà lo cap d’aficha de la dimenjada qu’arriba. Carcassona serà en dangièr a Palau; Avinhon deuriá tornar trobar los camins de la victòria amb la recepcion de Vilanòva. Serà pas aisit als Orses de St Gaudenç de resistir als Dragonets coma Tolosa aurà de dificultats per arrestar lo vam de Limós; mas las partidas demòran de jogar…
 
 
 
 
Alan Roch




abonar los amics de Jornalet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article