Bandièra01 1180x150: Comuna de Tolosa

Actualitats

Rugbi de XIII: los Dragons malautejan

Lo mes de febrièr de 2018 serà pas un bon sovenir pels Dragons Catalans

La defensa de Wakefield arrèsta Greg Bird
La defensa de Wakefield arrèsta Greg Bird | Dragons Catalans
Superliga: los Dragons totjorn a 0
 
Aqueste dissabte, los Dragons recebián Wakefield a Brutus amb la necessitat de signar una primièra victòria. Coma sovent, se fasián susprene per un ensag anglés tre la 5a minuta, mas lo segonda-linha Benjamin Garcia puntava aprèp una bèla ofensiva catalana. Lucàs Albèrt transformava e ajustava doas penalitats. A una minuta de la pausa, un tombat contrat e èra un ensag de 90 mètres per Wakefield: 10-8 pels Dragons.
 
A la represa, los catalans ensajavan d’aumentar lor avantatge, mas lo pilar Fifita placat èra pas tengut al sòl e se relevava per marcar l’ensag. Lo mesclanha Finn ajustava la transformacion e una penalitat. Coma l’ensag dins lo canton de Tierney èra pas transformat, los catalans acaban la partida a 14-16 amb un molonàs de pentiments. E ara, cal anar cò del campion: Leeds aqueste divendres!
 
Aqueste dissabte, los Tigres de Castleford an batut Hull-FC: 28-18. Divendres, tres partidas foguèron jogadas: Salford passèt 36-12 a Hull KR; los Lops de Warrington contrarotlèron Wigan: 16-10 e St Helens anèt ganhar a Huddersfield: 26-12. Dimenge, Leeds perdèt 23-6 cò dels Vikings de Widnes.
 
Al classament, St Helens e Wakefield son a las primièras plaças amb tres victòrias en tres partidas, alara que los Dragons son tancats a la darrièra plaça amb zèro punt.
 
 
Tolosa mai fòrt que los Centurions
 
Lo Tolosa Olimpic jogava dimenge a Leigh, una formacion qu’èra l’an passat en Superliga. A la pausa, los tolosans èran menats 14-6 e lor pilar american Pettybourne èra estat remandat al vestiari (carton roge per placatge naut). Dins lo segond temps, a 12 contra 13, l’esquipa occitana marquèt 5 ensages per s’impausar 32-26. Dissabte 3 de març, a 5 oras del vèspre, a Blanhac, los tolosans reçaupràn Rochdale.
 
 
Lesinhan, cap de fila aprèp las partidas anar
 
Aqueste dimenge, se jogava la darrièra jornada de la fasa anar del campionat d’Elèit 1 (mas qualques partidas anulladas demòran de jogar).
 
A Vilanòva, calguèt anar a las prolongacions e al punt en aur: los locals manquèron tres tombats e lo dobertura Wall passèt lo de la victòria per St Gaudenç: 27-26.
 
Festenal ofensiu a Carcassona ont l’ASC confirmèt sa victòria de Copa fàcia a Tolosa: 48-22. Los Dragonets, amb lo refòrt de 4 Dragons, baton Albi: 30-16. Lo campion Limós ten Avinhon a distància 32-16. Al Molin, Palau opausa una brava resisténcia a Lesinhan, mas plega 30-24. Los Verd e Blanc sèrvan atal lor primièra plaça al classament.
 
Al programa de la primièra dimenjada de març: Carcassona-Avinhon (dissabte), Lesinhan-Tolosa, Limós-St Gaudenç, Dragonets-Vilanòva e Albi-Palau.
 
 
 
 
 
Alan Roch
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article