La Val d’Aran manifèsta uèi en favor de la lenga. Jos lo lèma “Er aranés, era nòsta identitat”, una manifestacion se tendrà a partir de 18h a Vielha. Lo cortègi partirà davant l’escòla Garona de la capitala aranesa. La manifestacion seguís la crida del collctiu Lengua Viua que sa tòca es de promòure l’usatge social de la lenga del país. Podètz trobar mai de detalhs sus la pagina Facebook del collectiu.


 
La mobilizacion  respond a las divèrsas atacas que la lenga occitana a patidas de part de las autoritats de l’estat espanhòl. D’un costat, lo Tribunal Constitucional a anullats los articles de la Lei de l’Occitan que priorizan l’aranés dins las administracions, de l’autre lo sistèma educatiu aranés d’immersion en occitan es en perilh en causa de l’aplicacion de l’article 155 de la Constitucion espanhòla pel qual l’estat contraròtla lo govèrn de la Generalitat de Catalonha.
 
Mas saique lo detonador foguèron las declaracions que faguèt a prepaus de tot aquò lo ministre espanhòl de l’educacion, Íñigo Méndez de Vigo.  En responsa a una question pausada per la senatritz d’ÈRC Anna Azamar, Méndez de Vigo assolidèt que “lo sol risc que corron los que parlan aranés son las avalancas”.
 
Crida del collectiu Lengua Viua
 
Lo collectiu Lengua Viua demanda que la manifestacion d’uèi siá nombrosa, e que “eth sentiment que se ve eth dia d’Aran per sa Lengua sigue tanben present ara que [les] cau hèr a sénter més que jamès”.
 
“Coma collectiu que defense er usatge der aranés, e dempús des declaracions deth ministre Méndez de Vigo e dera senténcia deth Tribunau Constitucionau sus er usatge preferent der aranés enes administracions publiques, credem qu’auem de hèr-mos a sénter”, çò dison.