Un primièr temps o 60 minutas o mai pòdon èsser favorablas a una formacion, puèi lo sòrt d’una partida cambiar del tot al tot. Aquò arriba plan sovent dins los espòrts e doncas, tanben, al XIII.

Los Dragons: del solelh a la nuèit escura
 
Aqueste dissabte, los Dragons recebián Wigan a Brutus. Lo primièr temps foguèt las mai bèlas de las 40 minutas que joguèron dempuèi la debuta de la sason: una defensa de fèrre, qualques atacas de tria, un jòc al pè segur. Amb dos ensages –un de 90 mètres de l’arrièr David Mead–, las doas transformacions, una penalitat e un tombat de Gigòt: aquò fasiá 15-0 a la pausa pels Sang e Aur. A la represa, lo segonda-linha Jullien puntava un novèl ensag. Gigòt transformava. Wigan marcava dins lo recanton; Gigòt ajustava una penalitat: 23-4 pels catalans a la 50a minuta. La darrièra mièja ora foguèt del tot al tot roja e blanca que los angleses trapèron la falha dins la defensa sang e aur, que tenguèron lo balon mai que jamai, amb las penalitats que se metèron a plòure mai a tòrt que de rason suls catalans desvariats que finiguèron que pleguèron: 32-23 e a aver lo moral al fons de las caucetas.
 
Dimenge, caldrà anar desfisar los Tigres de Castleford! Una esquipa qu’es anada batre, aqueste dimenge, Huddersfield 40-28 alara que Leeds ganhava a Wakefield: 28-26. Dissabte, vegèt tanben las victòrias de Warrington a Salford 22-6 e d’Hull KR contra Widnes 31-12. Divendres, St Helens s’èra mostrat mai fòrt qu’Hull FC 26-12 per demorar cap de fila del classament.
 
 
Tolosa se relança
 
A Blanhac, dissabte, Tolosa signèt sa ueitena victòria de la sason en dominant tranquillament Barrow 50-4. Dissabte, los tolosans jogaràn a Batley, una formacion per l’ora setena al classament.
 
 
Elèit 1: suspresas e mièjas suspresas
 
Dissabte, Avinhon agèt totas las penas del Mond per batre Palau 36-32. A Vilanòva, Lesinhan –menat 18-6– marquèt un primièr ensag que ramenèt l’esquipa de Corbièras a 12-18, puèi un segond quasiment al pè dels pals a qualques minutas de la fin. Mas lo tustaire lesinhanés encapèt pas los pals e Lesinhan pèrd en país aquitan: 18-16.
 
Dimenge, en Comengés, calguèt anar al punt en aur per que Sent Gaudenç batèsse Albi: 12-8. Dins las autras doas partidas, los Dragonets s’impausèron aisidament a Tolosa amb una brava estrilhada: 62-8, e Limós ganhèt un dèrbi que lo dominèt de la primièra a la darrièra minuta fàcia a Carcassona: 30-0.
 
Dimenge, lo calendièr se metrà a jorn amb lo desplaçament d’Albi a Vilanòva dissabte e de Limós a Tolosa, dimenge. Los 21 e 22 d’abril, las 10 esquipas se traparàn a l’estadi Domèc de Carcassona per la Dimenjada Magica.
 
 
NRL: los Dragons demòran cap de fila
 
Los Dragons de Sant Jòrdi Illawarra an signat lor cinquena victòria en batent los Lapinons: 16-12. Una autra esquipa a pas encara conegut la desfaita: los Combatents neozelandeses venceires dels Vaquièrs: 22-12 (www.nrl.com).
 
 
 
 
Alan Roch